Membru FALINTIL-FDTL Na'in 15 Partisipa Formasaun Multimédia Iha Timor Post

Dili, 28 Abríl 2025

 

‎Membru FALINTIL-Forsa Defeza Timor-Leste, husi Kuartel Jenerál no Komponente inklui Unidade hamutuk na'in sanulu resin lima (15), partisipa iha formasaun Multimédia iha Sentru Formasaun Timor Post, iha abertura Xefe Gabinete, Xefe Estadu Maior Jenerál F-FDTL, Koronél Marcelino Ximenes "RIZAI" hatete, Hodi Instituisaun nia naran ható agradese ba Sentru Formasaun Timor Post tamba bele oferese formasaun ida ne'e, hodi forma militár sira sai jornalista ne’ebé profisionál.

 

‎”Ha’u ladun apar ho situasaun hirak ne’e maibé ha’u lee ona iha Internet katak, multimédia hanesan forma ida ne’ebé mai husi Testu, Audio, Gráfiku ,Website, Youtube, sira ne’e atu fó imformasaun ba komunidade no entidades sira, ho nune’e maka hakarak husu ba partisipante sira husi F-FDTL, fó atensaun maximu, mesmu balu tuir ona no balu foun saida mak formadór sira fó imi tenki halo tuir ida ne’e, servisu makas husu pergunta halo diskusaun, hodi bele komprende di’ak liu tán kona-bá multimédia”.

 

‎Nia mós subliña tán katak, ba formandu sira ida ne’e oportunidade ba imi, esforsu-aan estuda makas tó kursu ne’e hotu, imi bele lori buat ruma fila-fali ba ida-idak nia servisu fatin, nomós ba formadores sira kuandu fó matéria ba sira halo diskusaun no halo Prátika ba sira, depois de sira fila-fali ba instituisaun, bele aplika saida mak hanorin ona.

‎Iha Fatin hanesan Diretór Ezekutivu Timor Post, Jacob Ximenes, hatete, Agradese ba instituisaun F-FDTL ba konfiansa mai iha sentru formasaun Timor Post hodi fasilita formasaun multimédia ba média ofiser sira, ne’ebé mak presiza.

 

‎”Ami hari’i sentru formasaun ida ne’e hodi fó formasaun ba sira ne’ebé mak iha talentu hakarak sai jornalista, nomós ba média ofiser sira iha instituisaun públiku no privadu sira. Husu ba imi aprende didi’ak hodi bele aplika iha imi nia servisu fatin, bele mós uza imi nia matenek hodi servisu di’ak liu tán iha imi nia instituisaun”.

 

Ba formandu sira husi F-FDTL ba imi ne’ebé foun no sira ne’ebé mak aprende ona iha etapa liu bá tenki aprende oinsá mak lala’ok jornalizmu ninian ho karákter profisiónais, atetude kona-bá jornalista nian. Husu atu apoiu malu nafatin ba oin karik programa ruma mak seidauk iha, ita presiza aumenta tan futuru, hakotu Diretór Ezekutivu Timor Post, 28 Abríl 2025.

 

‎Entretantu programa ne’e husi Seksaun Jenéru FALINTIL-FDTL nian ne'ebé servisu hamutuk ho média Timor Post hodi fasilita formasaun ba formandu hamutuk na'in 15 husi Instituisaun F-FDTL nian durante fulan ida.

 

‎Partisipa iha abertura ne'e, Xefe Gabinete CEMGFA, Koronél Marcelino Ximenes “RIZAI”, Komandante Apoiu Kuartél Jenerál, Tenente Koronél Grad, Vitorino Soares, Reprezentante D1, Kapitaun Romeu Freitas, Xefe Seksaun Jenéru F-FDTL, Kapitaun Marquita da Cunha, Xefe Seksaun Relasaun Informasaun FALINTIL-FDTL, Tenente Tomé Soares, Diretór Ezekutivu Timor Post Jacob Ximenes inklui Formadores no Formandus sira.

 

‎Média F-FDTL.