Membru FALINTIL-FDTL Nain 30 Remata Kursu CPC Iha CICNL - Metinaro
Metinaru 07 Fevereiru 2025
Membru FALINTIL-Forsa Defeza Timor-Leste husi Komponente no Unidade inklui Kuartél Jenerál hamutuk nain 30 remata ona kusru CPC (Curso Promoção Capitão), kursu ida ne’e halao iha sentru instrusaun Komandante Nicolau Lobato Metinaro durante fulan ualu (hahú iha data 01 Juñu 2024 to’o 07 Fevereiru 2025.
Iha intervista Xefe Estadu Maior FALINTIL-FDTL Brigadeiro Jenerál José da Costa Soares “TRIX” hateten, ohin ita halo enseramentu kursu ida ne’e bá dala IX desde hahú Forsas Amadas FALINTIL-FDTL mai to’o 2025. Militares hirak ne’e mai husi Komponente Forsa Terrestre (CT) Komponente Naval (CN), Komponentes Aérea Lizeira (CAL), no Unidade sira hotu inklui mós kuartel Jenerál, no ohin Sira remata ona, no sira ida-idak sei fila fali bá ninia fatin servisu tamba estrutura vaga sira ne’ebé iha Komponente no Unidades iha ne’e maka haruka Militares sira ne’e tuir formasaun Kursu kapitaun no Primeiru Tenente ninian, dehan Xefe Estadu Maior Brigadeiro Jenerál TRIX.
Xefe Estadu Maior FALINTIL-FDTL Brigadeiro Jenerál akresenta liu tan katak, militár ohin remata ona formasaun ne’ebé sira sedauk promove, maibé tenki lao tuir regras estrutura instituisaun ninian, ne’ebé aban bele promove, bainrua bele promove no baintolu bele promove maibé sira kursu Promosaun Kapitaun ne’e pronto tia ona ne’ebé enkualker tempu deit bele promove tuir estatuto ou estrutura ne’ebé iha Komponente no Unidades ida-idak ninian.
Kursu ou formasaun ne’e tinan-tinan sempre la’o desde hahú rekrutamentu to’o lideransa ne’e permanese depende la’o tuir eskalaun estrutura ne’ebé instituisaun idaidak nia presiza.
Ohin hau kolia lia fuan ida kona-bá Lealdade, lealdade ida ne’e kumpri orden komandu ninian, kumpri lisan ita nia asuwain sira nian, ne’ebé sira rai hela bá ita, ida ne’e maka importante ou mantein ita nia disipliña korazen no oinsá auto konfiansa ou fiar a’an, karik kondisaun ida laiha ita halo oinsá para komanda ninia militár atus ida resin ne’e, tamba komandante kompaña la’os komanda seksaun ou pelutaun maibé komandante kompaña ne’e komanda kompaña ema atus ida bá leten.
Média F-FDTL
