Reprezentante XEMJFA Ensera Kursu Lideransa Oficial Desemvolvimentu Nian No Treinamentu Apoiu Ba Paz
Metinaro 23 Abríl 2026.
Reprezenta Xefe Estadu Maior Jenerál FALINTIL-Forsa Defeza Timor-Leste (F-FDTL) Liu husi Komandante Forsa Apoiu Geral (FAG) Tenente Coronel João Bosco Ximenes "Lenok" ensera kursu lideransa ofisial dezemvolvimentu nian no Treinamentu pelotaun apoiu ba paz nian iha Centru Instrusaun Comandante Nicolau Lobato (CICNL) Metinaru.
kursu sira ne'e konduse husi CTOAP/CICNL durante fulan rua (2) nian laran desde loron 23 fulan Fevereiru to'o ohin loron 23 Abril 2026 ho total partisipante / formandos 57 pessoas ne'ebé mai husi Komponente no Unidade sira. Ho oportunidade ida ne'e mós, hakarak relata katak, atividade formasaun ida ne'e hetan apoiu makás em termos material, ekipamentu inklui instrutor sira husi ita nian parseiru Forsa Australiano sira liu-husi DCP-TL.
"Nudar komandante Forças de Apoio Geral nian ho hanoin klean hakarak fó parabéns no boa-aproveitamentu ba ita-bo'ot sira hotu ne'ebé ohin simu ona sertifikadu katak, ita-bo'ot sira kompleta ona kursu iha materia LIDERANSA OFICIAL DESEMVOLVIMENTU NO TREINAMENTU PELOTAUN APOIU BA PAZ NIAN, no sertifikadu ida ne'e mós serve nudar prova real ida ba esforsu oi-oin ne'ebé ita-bo'ot sira halao ona liu husi matenek, kooperasaun diak, determinasaun, disiplina no responsabilidade durante fulan rua (2) nian laran maka, ohin hatudu rezultadu ne'ebé diak no susesu" hateten Komandante FAG.
"Ita hotu nian prezensa iha fatin ida ne'e hodi fó sasin ba progresaun kapasitasaun ba ita nia maluk militár 57 pessoas nian, no eventu espesial ida ne'e mós, hatudu passu importante ida ba formasaun iha âmbitu LIDERANSA NO OPERASAUN APOIU BA PAZ nian".
"Perante ita-bo'ot sira hotu hakarak hatete katak, fatór fundamental ne'ebé sempre fó sucesu ba atividade kursu no formasaun sira ne'e, mai husi jestaun ne'ebé diak husi Centro de Instrução Comandante Nicolau Lobato (CICNL) nian. Ida ne'e ita hotu tenki rekuñese. Aleinde ida ne'e, nudar komandante Forças de Apoio Geral (FAG) nian hakarak hato'o agradesimentu wain ba apoiu oi-oin husi parte Forca de Defeza Australia nian liu husi DCP-TL ba atividade formasaun sira ne'e no husu atu liu husi DCP-TL kontinua mantein apoiu ba iha atividade formasaun sira ne'e iha futuru".
"Ha'u kontente no hare'e katak, ita-boot sira dezenvolve ona kuñesimentu klean iha materia LIDERANSA OFICIAL DESEMVOLVIMENTU NO TREINAMENTU PELOTAUN APOIU BA PAZ NIAN, Realmente, materia sira ne'e importante teb-tebes ba ita-bo'ot sira basá, ita-bo'ot sira manan ona kuñesimentu no esperiensia barak no klean durante periodu kursu nian".
Hakarak hatete ba ita-bo'ot sira katak, nudar komandante Forças de Apoio Geral nian, hau simu imformasaun ligadu ho tipu material sira kursu TREINAMENTU LIDERANSA OFICIAL DESEMVOLVIMENTU no TREINAMENTU PELOTAUN APOIU BA PAZ nian husi Dirasaun Formasaun katak, iha kursu ida ne'e, ita-bo'ot sira simu materia espesifiku oi-oin ne'ebé importante teb-tebes. Portantu, materia ba kursu LIDERANSA OFICIAL nian, orienta liu ba oinsa atu prepara oficial sira hodi komanda forsa ba operasaun manutensaun apoiu ba paz nian no importante liu maka materia barak ligadu ho Kompeténsia nudar komandante kompañia nian".
"Aliende ne'e, ba maluk sargentu no praças sira, nudar komandante hau konfirma katak, iha materia TREINAMENTU PELOTAUN APOIU BA PAZ nian, ita-bo'ot sira aprende klean teb-tebes kona ba treinu tátika individual kombate nian, treinu koletivu ba kombate nian, treinu ba misaun operasaun ba apoiu paz nian inklui materia espesífiku sira seluk. Nune'e hakarak hato'o boa-aproveitamentu no boa-sorte ba ita-bo'ot sira hotu".
"Nudar komandante FAG nian, hakarak enkoraja atu tau iha pratika ita-bo'ot sira nian abilidade ka kuñesimentu liu husi atividade diaria nune'e, materia espesífiku oi-oin ne'ebé ita-boot sira aprende labele lakon le'et deit no labele hela deit ho ita-bo'ot sira, maibé tenki fahe hodi hadaet ba maluk militár sira seluk. Hanoin mós katak, kuñesimentu iha materia LIDERANSA OFICIAL DESEMVOLVIMENTU NO TREINAMENTU PELOTAUN APOIU BA PAZ nian nudar BUKAE essencial ida ba ita-boot sira".
"Ho kualidade hanesan komandante FAG nian, ho hanoin klean hakarak hato'o agradesimentu wain dala ida tan ba ita-bo'ot (formadór) sira husi FALINTIL-FDTL nian, li-liu agradese wain ba formandolór sira husi Forsa Australiano nian ne'ebé sempre fó tulun makás ba programa no atividade formasaun sira ne'ebé realiza iha CICNL. Portantu, resultadu real husi koopersaun ne'ebé maka la'o durante ne'e entre FALINTIL-FDTL no Forsa Defeza Australia nian bele dehan pozitivu teb-tebes, nune'e hodi naran Xefe Estadu Maior Jenerál FALINTIL-FDTL nian, hato'o ami nia gratidaun no obrigadu wain dala ida tan. No espera katak, servisu hamutuk ida ne'e bele kontinua bebeik iha fututru".
"Ikus liu, hau nia parabéns dala ida tan ba graduadu sira no sauda ita-boot sira nia susesu. Ita hein atu haré resultadu pozitivu sira ba unidade, komponente no instituisaun FALINTIL-FDTL liu husi serbisu ne'ebé ita-bo'ot sira halao kada loron. Basaa, liu husi asaun diária ne'ebelé ita-bo'ot sira presta maka nudar prova ida katak, durante processu formasaun ne'e, ita-bo'ot sira aproveita ho diak".remata.
Média F-FDTL
J. Silva
