Serimónia Inagurasaun Instalasaun Akademia Militár Konjunta Iha Aileu

Aileu, 02 Fevereiru 2026

Xefe Estadu Maior Jenerál FALINTIL–Forsa Defeza Timor-Leste (F-FDTL) Tenente Jenerál Domingos Raúl “Falur Rate Laek”, Partisipa iha serimónia inagurasaun instalasaun foun Akademia Militár Konjunta (AMC), no lansamentu ofisiál bá Website Institutu Universitáriu Defeza Nasionál (IUDN), iha Área Hundolte, Suku Liu Rai, Postu Administrativu Aileu Vila Munisípiu Aileu.

Serimónia inagurasaun ne’e hala’o iha ámbitu komemorasaun dala-25 Transformasaun Forsa Armada Libertasaun Nasionál Timor-Leste bá FALINTIL–Forsa Defeza Timor-Leste (F-FDTL), ne’ebé selebra iha loron 2 Fevereiru 2026. Momentu ida ne’e konsidera hanesan marku importante iha prosesu konsolidasaun soberania, integridade teritoriál no fortalese defeza nasional Estadu-Nasaun Timor-Leste.

Serimónia ne’e organiza husi Ministériu Defeza (MD) Institutu Defeza Nasionál (IDN) no Komandu FALINTIL–Forsa Defeza Timor-Leste (F-FDTL), hanesan parte husi programa ofisiál komemorasaun Transformasaun FALINTIL bá F-FDTL dala-25. Edifísiu Akademia Militár Konjunta tuir planu Governu Konstitusionál nian no refere bá Planu Estratéjiku 2011–2030, ho objetivu hodi kapasita no moderniza Forsas Armadas no seguransa nasional.

Iha diskursu Xefe Estadu Maior Jenerál F-FDTL Tenente Jenerál Domingos Raúl “Falur Rate Laek”, hateten katak, inagurasaun Akademia Militár Konjunta marka kapitlu foun ida iha istória Timor-Leste, liuliu iha área defeza no seguransa. Tuir nia lian, eventu ne’e la’ós de’it serimónia inaugura edifísiu foun, maibé hanesan materilizasaun maturidade instituisionál Forsa Defeza Timor-Leste nian.

Nia salienta katak se iha tempu rezisténsia foho-lolon sira sai hanesan base luta bá guerilheiro sira, entaun iha loron ohin, sala-estudu sira iha Akademia Militár Konjunta sei sai hanesan laboratóriu bá formasaun intelektual militár, ne’ebé sei garante soberania no seguransa Nasaun iha futuru. Área Aisirimou, iha Munisípiu Aileu, nu’udar fatin istóriku rezisténsia FALINTIL, torna-se simbolu kontinuidade husi prosesu transformasaun FALINTIL ba F-FDTL.

Partisipa iha serimónia ne’e mak hanesan Prezidente Tribunal Rekursu Dr. Afonso Carmona, Ministro Defesa Kontra Almirante Donaciano Costa Gomes, Ph.D, Xefe Estadu Maior Jenerál F-FDTL Tenente Jenerál Falur Rate Laek, Deputadu Parlamentu Nasionál sira, Eis Titular sira, Jenerál Taur Matan Ruak, Tenente Jenerál Reformadu Lere Anan Timor, membru Governu, Korpu Diplomátiku, Provedor dos Direitos Humanos e Justiça (PDHJ) Dr. Vergílio Guterres, autoridade sivíl no militár, Prezidente Autoridade Munisípiu Aileu João Bosco, konvidadu onoráriu sira, no komunidade husi Munisípiu Aileu.

Media F-FDTL

Leoneto de Jesus