Vise CEMGFA Das F-FDTL Simu Vijita Husi Konsuladu Embaixadór Korea
Kuartel Jenerál,07 Fevereiru 2025
Vise Xefe Estadu Maior Jenerál FALINTIL-Forsa Defeza Timor-Leste (F-FDTL) Major Jenerál Calisto Santos ‘Coliati’, ohin simu vijita husi konsuladu Embaixada Korea nian iha Timor-Leste Mrs. Park Hye-Ri, iha nia kna’ar fatin Kuartel Jenerál F-FDTL, Fatuhada, Dili.
Objetivu husi vijita ne’e koalia liu kona-bá kooperasaun entre Governu Timor-Leste ho Korea do Sul nian, atu hametin liutan relasaun entre Nasaun rua ne’e, liliu iha area desporto nian hanesan Taekwondo, atu nune’e membru FALINTIL-Forsa Defeza Timor-Leste (F-FDTL) tomak sei tuir hotu treinu Taekwondo.
Iha intervensaun Vise Xefe Estadu Maior Jenerál FALINTIL-Forsa Defeza Timor-Leste (F-FDTL) Major Jenerál Calisto Santos ‘Coliati’ hateten, nia parte agradese tebes bá Gonernu Korea tamba nafatin iha komitmentu ajuda Timor-Leste liliu iha Forsas Armadas Timor-Leste nian.
“ Lori komandu FALINTIL-Forsa Defeza Timor-Leste (F-FDTL) hakarak hato’o apresiasaun no agradese wain tebes bá Governu Korea do Sul ne’ebé nafatin iha komitmentu atu apoiu nafatin kapasitasaun bá ami nia Militár sira liliu iha area desporto ninian hanesan Taekwondo ida ne’e ami agradese no kontente tebes”
Antes remata enkontru ema numeru dois iha Instituisaun FALINTIL-FDTL ne’e fó mós prezente ida ou tara tais bá konsuladu Embaixada Korea iha Timor-Leste Mrs. Park Hye-Ri, hanesan simbolu ida hodi kesi metin nafatin lasu amizade entre Timor-Leste ho Korea do Sul liliu iha area Militár ninian.
Media F-FDTL
