Xefe Estadu Maior Jenerál F-FDTL Hala'o Abertura Ba Kursu Forsa Operasaun Espesiál Dala-V 2026

Metinaru, 30 Jullu 2026 

Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”, hala'o abertura ba Kursu Forsa Operasaun Espesiál (CFOE) dala-V ba tinan 2026, ne'ebé organiza husi UNIDADE FALINTIL (UF), iha Metinaru.

Kursu ida-ne'e nu'udar parte husi esforsu institusionál F-FDTL atu kontinua hasa'e kapasidade no profisionalizmu membru F-FDTL, liuliu iha área operasaun espesiál, liuhusi formasaun no treinamentu ne'ebé intensivu no espesializadu.

Iha âmbitu nee Xefe Estadu Maior Jenerál F-FDTL nia intervensaun hateten "Ho onra boot maka ha'u prezide abertura ba Kursu Formasaun Operasaun Espesiál 2026 ida-ne'e, momentu ne'ebé marka inísiu ba perkursu ne'ebé ezijente, maibé dignifikante tebes, ba hotu-hotu iha ne'e".

"Unidade FALINTIL mak Unidade ida ne'ebe espesial iha ita nia forsas armadas. Unidade ne'ebe karrega memória moris ita-nia luta libertasaun nasionál durante tinan ruanulu-resin-haat rezisténsia armada, iha-ne'ebé povu timoroan, iha foho lolon no aldeia sira, hamriik nu'udar retaguarda estratéjika ba ita-nia gerrilleiru sira. Retaguarda ida-ne'e -ita nia povu fó-han, subar, orienta, no sustenta rezisténsia bainhira buat hotu parese lakon. Tanba ne'e mak Unidade ida ne'e hatuur iha prinsipiu incontornável: forsa espesiál neʼebé forma iha ne'e tenke hatene respeita, no proteje povu ne'ebé sustenta nia, hanesan gerrilleiru FALINTIL sira hatene halo".

"Sai forsa espesiál ezije laos deit rezisténsia fizika. Presiza dixiplina interiór, diskrisaun, abilidade atu foti desizaun iha kondisaun inserteza, no liuliu,inisiativa - pesoál no grupu nian - bainhira sirkunstánsia sira la permite hein ba orden husi superior. Kualidade asaun desizivu ida-ne'e, kombina ho haraik-an hodi hatene integra iha ekipa, maka distinsaun lolos husi operador espesiál ida".

"Senhores Ofisiáis instrutores barak ne'ebé hetan formasaun iha akademia sira iha rai-li'ur, sei lori koñesimentu tékniku no doutriná ne'ebé maka sai hanesan baze ba forsa modernu. Maibé koñesimentu ida-ne'e hetan de'it valór se nia abut metin iha ita-nia realidade konkreta: jeografia rai Timór nian, klima ne'ebé alterna entre rai-maran no udan, vejetasaun ne'ebé moris iha ita-nia foho lolon sira. Imi sei aprende atu orienta an iha terrenu ida-ne'e, atu rekoñese rekursu ai-han ne'ebé ita-nia rai oferese, no atu transforma koñesimentu tradisionál ita-nia povu nian ba abilidade sobrevivénsia loloos. Matenek sira ne'e mak permite ami gerrilleiru sira atu reziste durante tinan naruk".

"Preparasaun fizika, forsa mentál, koezaun ekipa nian, no domíniu ba téknika sobrevivénsia sira maka pilar sira husi kursu ida-ne'e. Pilar sira-ne'e mós labele hamriik mesak lahó valór. Unidade FALINTIL signifika fahe prinsipiu no komportamentu gerrilleiru sira nian, maka: lealdade, sakrifisiu, haraik-an iha povu nia oin, no aten-barani ne'ebé la gaba-an maibé hatudu iha silénsiu".

"Ba ita boot sira hotu, ha'u husik hela mensagem: sente orgullu ba! tanba hetan selesaun ba kursu ida-ne'e ne'ebé ema barak la konsege. Imi oitoan maka to'o iha ne'e. Halo oportunidade ida ne'e sai momentu ida atu hatudu ba imi nia an rasik no imi nia kamarada sira katak imi merese titulo ne'ebé loron ida imi sei hola parte iha Unidade FALINTIL hanesan Forsa Espesiál".

"Ho liafuan sira-ne'e, hau dezeja ba ita-boot sira hotu aten-barani, dixiplina no susesu, ha'u deklara Kursu Formasaun Operasaun Espesiál 2026 nian hahu". Remata.

Partisipa iha abertura ne'e mk Vise Xefe Estadu Maior Jenerál F-FDTL, Major Jenerál Calisto Santos Coliati, Major Jenerál Aluk Deskartes, Reprezentante Komandante no Unidade, Ofisiáis Instrutóres no inklui Prezadus formandus.

Ekipa Média F-FDTL

Cabo J' Silva