Xefe Estadu Maior Jenerál F-FDTL Halo Enkontru Kortezia Ho Adido Defesa India

Kuartel Jenerál, 25 Marsu 2026

Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek halo enkontru ho Adidu Defeza Kapitaun Mar e Guerra Shiv Kumar, bá Indonésia ho Timor-Leste husi Nasaun India, iha kna'ar fatin Kuartel Jenerál F-FDTL, Fatuhada, Dili.

Enkontru ne'e ho objetivu atu hametin liu tan relasaun amizade no Kooperasaun Teknika Militár entre Nasaun rua ne'e nian.

Iha enkontru ne'e, parte rua diskute kona-bá oinsá atu hasa’e konesimentu militár, inklui treinamentu, troka esperiénsia, no dezenvolvimentu kapasidade bá Forsas Armadas. Inisiativa ida ne’e mós hatudu komitmentu husi Timor-Leste no India atu kontinua haforsa relasaun bilateral, liuliu iha setor defeza.

Ho koperasaun ida ne’e, espera katak lasu amizade entre F-FDTL no instituisaun Militár India nian sei sai forte liutan, no bele kontribui bá estabilidade no seguransa.

Media F-FDTL

Izidor Lopes