F-FDTL Husi Kuartel Jenerál Ohin Realija Marsa Forsada

Dili, 24 Abril 2026

Membru FALINTIL-Forsa Defeza Timor-Leste (F-FDTL) husi Kuartel Jenerál, hamutuk ho asesor Austráliano sira, ohin realiza ezersísiu Marsa Forsada husi ponte Kasnafar to’o iha bee Tudak Fatisi.

Objetivu husi atividade ida ne’e maka tuir planu matrís anual Komandu F-FDTL, ne’ebé kada tinan sempre implementa atu bele hasa’e liu tan kapasidade fiziku membru sira nian, hodi kumpri misaun ho di’ak.

Xefe ekipa, Tenente Koronel Graduadu Helio da Costa, iha intervista hateten katak ezersísiu ida ne’e realiza regularmente kada tinan. Nia esplika katak atividade ne’e tuir matrís ne’ebé aprova ona husi komandu, ne’ebé normalmente Marsa Forsada realiza dala rua iha tinan ida. Hanesan mós, prova aptidaun fiziku mós realiza dala rua kada tinan.

Nia hatutan katak membru sira ne’ebé partisipa iha ezersísiu ohin mai husi Kuartel Jenerál de’it, maibé kada Komponente no Unidade sira iha F-FDTL mós normalmente realiza atividade hanesan. Bá loron ohin nian, programa ne’e espesifikamente organiza bá Kuartel Jenerál hodi prepara no fortifika fiziku Militár sira.

Media F-FDTL

Ekipa Media F-FDTL