Fc.Pilatus Manan Fc.Furry Ho Skore 11-1 Iha Abertura Taça Rotativa Comandante Nicolao Lobato
Metinaro, 13 Marsu 2025
Komandu FALINTIL-Forsa Defeza Timor-Leste (F-FDTL) liuhusi Unidade Sentru Instrusaun Komandante Nicolao Lobato realija jogu futeboll taça rotativa Comandante Nicolao Lobato, hodi selebra aniversáriu loron Unidade Sentru Instrusaun Komandante Nicolao Lobato nian bá dala 24, ne'ebé monu iha loron 19 Fevereiru tinan 2025 ne'ebé ita selebra liu ona.
Iha intervista Prezidente Komisaun Organizadora bá eventu refere Major Infantaria David Leopoldo dos Santos hateten, objetu husi realija jogu ida ne'e tamba lori komemora loron aniversáriu CICNL nian dala 24, ne'ebé ita selebra liu ona iha fulan kotuk, alende ne'e mós realija jogu ida ne'e oinsá atu kria lasu amizade entre joventude ho Forsas Armadas sira, liliu amizade entre joventude sira, tamba dala barak ita hatene sempre mosu problema entre joven sira ne'eduni ami ho inisiativa loke jogu ida ne'e.
Iha taça ida ne'e klubu hamutuk sanulu resin sia mak kompete iha jogu ida ne'e no sei final iha fulan Maiu tinan ida ne'e.
Jogu refere hetan apoiu fundus hosi doadores Internasional no Nasional sira, balun apoiu material hanesan bola no balun apoiu iha orsamentu ninian.
Lori komisaun nia naran hakarak hato'o bá jogador sira katak jogu ho disiplina tamba manan ga lakon ita mesak Timor oan hotu.
Media F-FDTL
