Formandu Na’in-10 Termina Ona 2° Kursu Intensivu Lian Portugués Fins Espesífiku

Metinaro, 09 Jullu 2025.

Formandu na’in sanulu (10), termina ona segundu kursu Intensivu Lian Portugués nivél A1/A2, no nível B1/ nivél B2 sei iha faze esperimentál, ne’ebé hala’o iha Sentru Instrusaun Komandante Nicolau Lobato Metinaro Dili.

Iha diskursu Komandante Forsa Apoiu Geral, Tenente Koronel João Bosco Ximenes "LENOK", hatete, agradese bá Exelénsia sira ne’ebé tuir ona serimónia enseramentu ida-ne’e bá Kursu Intensivu daruak iha Lian Portugés bá Fins Espesífiku nian.

“Kursu Intensivu daruak bá Lian Portugués Fins Espesífiku durante tinan ida, ninia objetivu prinsipál maka atu forma pesoál Militár Timoroan sira nu’udar formadór bá lian Portugués Fins Espesífiku sira, atu nune’e F-FDTL bele iha Militár Timoroan sira ne’ebé kualifikadu hodi hanorin Lian Portugués iha Komponente, Unidade no Órgaun oioin”.

Lian Portugués importante bá TL nu’udar meiu indispensável no distintivu atu afirma Nasaun ne’e iha kontestu Jeopolítiku Sudeste Aziátiku nian, no esensiál atu alkansa ninia objetivu polítiku no estratéjiku sira iha rejiaun ida-ne’e iha mundu. Tenik Komandante FAG.

Iha Sikun Seluk Diretór Tekniku Projetu-2, Tenente Koronel Infantaria, Bruno Miguel Clara Fernandes Gaspar Mendes, hateten, honra bo'ot bá ita hotu iha konvidadu bá enserramentu simbóliku ida-ne’e bá 2º Kursu Intensivu Lian Portugués bá Fins Espesifiku (CIPFE).

“Formasaun ne’e kontribui diretamente bá dezenvolvimentu profisionál no dezenvolvimentu soldadu F-FDTL sira, iha sira-nia komandu bá lian portugués oinsá atu forma soldadu Timoroan sira nu’udar futuru formadór lian Portugués nian bá Fins espesífiku sira, hodi fó dalan bá sira atu hanorin. Ida-ne’e nu’udar hakat krusiál bá autonomia no sustentabilidade hanorin lian Portugués iha Instituisaun F-FDTL nia laran”.

Kursu ida-ne'e, loos duni, hanesan valór akresentadu ida bá futuru instituisaun nian. Liuhusi formadór Timoroan foun sira-ne’e, sei bele alkansa kualidade bo'ot liután iha preparasaun dokumentasaun ofisiál nian, hadia komunikasaun portugués tantu internalmente ho Asesór sira hodi fasilita dezempeñu misaun no funsaun sira iha futuru. Tenik Diretór Tekniku P2, 09/08/2025.

“Ba Profesór Lian Portugués obrigado bá imi-nia kompromisu no dedikasaun. Ha'u hatene katak viajen ida-ne'e ezije tebes bá ita-boot mós, prosesu ida ne'ebé kontínua bá aprendizajen, adaptasaun. Maibé ha'u iha serteza katak, bainhira ita-bo'ot haree fali bá viajen, ita-bo'ot sente, hanesan ha'u, katak ida-ne'e hotu vale duni”.

Kursu Intensivu daruak bá Lian Portugés Fins Espesifiku bá formandu na’in-10 mai husi Kuartel Jenerál, Komponente Naval, Unidade Polisia Militár, Unidade FALINTIL inklui Sentru Formasaun Komandante Nicolau Lobato durante tinan ida hahú loron 1/08/2024 no termina iha loron 9/08/ 2025.

Média F-FDTL

Nhoy Borges