Membru F-FDTL Nain Rua Termina Ona Misaun Apoiu Paz Iha Nasaun Sudaun Sul

Kuartel Jenerál, 17 Juñu 2026

Vise Xefe Estadu Maior Jenerál FALINTIL-Forsa Defeza Timor-Leste (F-FDTL), Major Jenerál Calisto Santos Coliati, ohin simu membru F-FDTL nain rua, kompostu husi Major Edi Fernando Viana no Major José Rodrigues da Cruz, ne’ebé termina ona sira nia misaun apoiu paz durante tinan ida iha South Sudan.

Iha sorumutu ne’e, Vise Xefe Estadu Maior Jenerál F-FDTL, Major Jenerál Calisto Santos Coliati, hato’o parabéns no bem-vindu bá membru nain rua ne’e tanba sira konsege termina misaun ho di’ak no susesu iha South Sudan.

“Ha’u reprezenta Komandu nia naran hakarak hato’o ha’u nia parabéns bá ita bo’ot sira nain rua tanba kumpri ona misaun ho di’ak no susesu. Ohin loron, imi fila fali mai Timor-Leste ho kondisaun di’ak, ne’ebé sai orgullu bá Instituisaun no Nasaun,” dehan Major Jenerál Calisto Santos Coliati.

Misaun apoiu paz ne’e reflete kompromisu F-FDTL atu kontribui bá estabilidade no manutensaun paz iha nivel internasionál, liu hosi partisipasaun iha operasaun sira ne’ebé promove seguransa no dame iha Nasaun sira ne’ebé presiza apoiu komunidade internasionál.

Ekipa Média F-FDTL

Izidor Lopes