Reprejentante CEMGFA Partisipa Iha Aniversáriu PDHJ Bá Dala-22 No Lansamentu Relatóriu Anuál 2025
Díli, 26 Maiu 2026
Reprejentante Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, ne'ebé reprezenta husi Xefe Gabinete CEMGFA, Koronel Marcelino Ximenes “RIZAI”, ohin partisipa iha serimónia komemorasaun aniversáriu Provedoria Direitus Humanos no Justisa (PDHJ) bá dala-22, ne'ebé realiza iha Salaun Komisaun Nasionál Eleisaun (CNE), Díli.
Serimónia refere marka tinan rua-nulu resin rua husi instituisaun PDHJ iha nia kna'ar atu promove, proteje no defende direitus humanos no prinsípiu justisa iha Timor-Leste.Iha okaziaun ne'e mós realiza lansamentu Relatóriu Anuál PDHJ tinan 2025, ne'ebé aprezenta rezultadu servisu, progresu no rekomendasaun sira relasiona ho promosaun governasaun di'ak, direitus humanos no estadu de direitu.
Partisipasaun reprejentante CEMGFA iha eventu ne'e reflete kompromisu F-FDTL atu kontinua hametin kooperasaun institusionál ho órgaun Estadu sira, liuliu iha área promosaun direitus humanos, respeitu ba lei no fortalese demokrasia iha Timor-Leste.
Media F-FDTL
Izidor Lopes
