Tenente Jenerál Abertura Kopa Navál, Husu Joventude Sira Kria Paz No Estabilidade
Hera, Dili, 06 Janeiru 2025.
Xefe Estadu Maiór Jenerál Forsa Defeza Timor-Leste, Tenente Jenerál Domingos Raul "FALUR RATE LAEK", abertura Kopa Navál, husu ba joventude sira kria paz no estabilidade iha sosiedade nia leet.
"Ohin abertura kopa Navál oinsá prepara imi sai joven ne'ebé hadomi bola no balun sai forsa atu nune’e ita bele kria paz no estabilidade iha Sosiedade nia leet tanba jogu ne'e iha manan no lakon tanba manan mós vitoria lakon mós ho vitória tanba lakon atu aprende jogu tuir mai bele hetan tatíku ne'ebé di'ak".
Subliña tan katak, ita hotu mai iha ne'e siknifika ita fó ita nia solidaridade ba ita nia Componente Navál tanba tristeza boot ita nia Forsa Armada liu-liu Componente Navál hasoru tanba ohin ita hotu nia prezensa ne'e hanesan jestu solidaridade ba ita nia aman no maun sira.
Iha sikun seluk Komadante Componente Navál Comodoro Higino das Neves, afirma kopa Navál la estabelese hanesan iha tinan kotuk liu ba tanba servisu barak.
"Ohin ita realiza fali kopa Navál ho prezensa Sua Selensia Xefe Estadu Maiór Jenerál F-FDTL sei motiva ami liu-liu Juventude sira tanba kopa Navál nia objetivu laos atu manan ka lakon maibé nia objetivu atu halibur joventude iha Timor laran tomak atu mai partisipa iha kopa ida ne'e atu kuiñese malu kria relasaun amizade entre pesoál ba malu no fahe mós esperiénsia abilidade ne'ebé imi iha atu utiliza iha kampu laos atu tuku malu no rai odi vingansa ba malu iha kampu maibé hatudu imi nia skíll no esperiénsia ba malu.
Iha fatin hanesan Prezidente Komisaun Kopa Naval Capitaun Tanente, Rosario Alves da Cruz, dehan kada tinan sempre realiza kopa Navál ne'ebé preve iha matris anuál hodi komemora ezisténsia Componente Navál nian.
"Kopa Navál sai ona simbolu relasionamentu entre Forsa Armada ho komunidade liu-liu hakbiit talentu ba ita nia Juventude sira nian atu kria paz iha komunidade nia leet."
Husu ba Klube 17 ne'ebé mak iha talentu no determinasaun ho mai kompete iha kopa Navál ida ne'e katak espiritu Desportiva prevalaza iha kada jogu atraves devosaun no respeitu nomós disiplina ba kopa Navál, hakotu nia.
Iha abertura loke ho jogu primeiru husi FC Abafu kontra FC Fatusa ho skor 3-1.
Média F-FDTL
