Vise Xefe Estadu Maior Jenerál F-FDTL Observa Klinika Militár Metinaro

Metinaro, 25 Maiu 2026 

Vise Xefe Estadu Maior Jenerál FALINTIL-Forsa Defesa Timor-Leste (F-FDTL), Major Jenerál Calisto Santos 'Coliati', ohin halo observasaun bá progresu rehabilitasaun Klinika Militár iha Sentru Instrusaun Komandante Nicolau Lobato (CICNL), Metinaro.

Iha vijita ne’e, Vise CEMGFA husu bá Diresaun Saúde Militár (DSM) atu kontinua tau atensaun bá edifísiu ne’ebé dadaun hela iha prosesu rehabilitasaun. Nia enfatiza katak patrimóniu no fasilidade sira ne’ebé iha tenke hetan manutensaun regular no uza ho responsabilidade atu garante durabilidade no benefísiu bá utilizadór sira hotu.

“Instalasaun no ekipamentu sira ne’ebé iha presiza manutensaun di’ak. Atu nune’e, utilizadór sira tenke uza ho kuidadu no responsabilidade atu evita estragus bá patrimóniu ne’ebé konstrui ho esforsu no apoiu husi parseiru sira,” dehan Major Jenerál Calisto Santos ‘Coliati’.

Iha oportunidade hanesan, nia mós hato’o agradese bá apoiu tomak ne’ebé kontribui bá rehabilitasaun Klinika Militár ne’e, liuliu bá Adidu Defesa Austrália no ekipa husi Defence Cooperation Program (DCP), hamutuk ho ekipa Engenharia Civil (RMS) ne’ebé fó apoiu durante prosesu rehabilitasaun. Nia manifesta esperansa atu iha tempu badak bele realiza inaugurasaun ofisial bá fasilidade ne’e após remata tomak obras sira.

Vijita observasaun ne’e akompaña husi Xefe Gabinete Vise CEMGFA, Koronel Guido de Oliveira, Adidu Defesa Austrália iha Timor-Leste, Koronel Matthew Richardson, Komandante Unidade Apoiu Servisu (UAS), Major Horacio Baptista, reprezentante Komandante CICNL, reprezentante FAG no membru ekipa relevante sira seluk.

Observasaun ne’e reflete komitmentu lideransa F-FDTL atu hadi’a nafatin infraestrutura saúde Militár, hodi garante servisu saúde ne’ebé di’ak liu bá efetivu F-FDTL no komunidade Militár tomak.

Media F-FDTL