Vise Xefe Estadu Maior Jenerál F-FDTL Partisipa Iha Enkontru Entre Xefe Forsas Armadas Asean Nian Iha Malázia

Malázia, 09-12 Setembru 2025

Vise Xefe Estadu Maior Jenerál FALINTIL-Forsa Defeza Timor-Leste (F-FDTL) Majór-Jenerál Calisto Santos “Coliati” reprezenta Sua Exelénsia Tenente-Jenerál Falur Rate Laek partisipa iha Enkontru Xefe Forsa Defeza husi nasaun ASEAN.

Majór Jenerál Coliati partisipa iha Enkontru Xefe Forsa Defeza ASEAN nian bá dala 22 (ACDFM) iha Kuala Lumpur, Malázia hahú husi loron 9 to'o 12 fulan-Setembru tinan 2025.

Fórum seguransa rejionál ho nível aas ne’e halibur Xefe Forsa Defeza sira husi Estadu-membru ASEAN nian, inklui Timor Leste, hodi troka perspetiva no hanoin kona-bá bá kooperasaun multilaterál hodi responde bá dezafiu sira seguransa rejionál nian.

Iha ninia intervensaun, Majór-Jenerál Coliati expressa katak nu’udar Estadu observadór, Timor-Leste rekoñese ho interese partikulár ASEAN nia kapasidade ne’ebé hatudu ona bá rezolusaun konflitu, hanesan evidénsia iha mediasaun disputa fronteira Kamboja-Tailándia foin lalais ne’e. Realizasaun ida-ne'e reprezenta avansu substansiál iha arkitetura seguransa rejionál, ne'ebé halo balansu ho efetivu bá prinsípiu la-interferénsia ho envolvimentu pragmátiku bá estabilidade rejionál.

Nia subliña katak F-FDTL nafatin dedika no esforsa an atu aprende no servisu besik ho omólogu sira ASEAN nian hodi hametin reziliénsia rejionál hasoru dezafiu seguransa nian ne’ebé evolui ho ritmu lalais.

Majór-Jenerál Coliati iha oportunidade hala'o mós reuniaun bilateral ho Jenerál Tan Sri HJ Mohd Nizam Bin HJ Jaffar, Xefe Forsa Defeza Forsas Armadas Malázia nian nu'udar uma na`in bá ACDFM, nune’e mós ho Jenerál Vong Pisen husi Kambódia.

Entretantu tinan oin Forsas Armadas Filipina nian maka sei sai uma-na'in bá ACDFM bá dala 23 iha Manila iha Maiu 2026.

Media F-FDTL