Xefe Estadu Maior Jenerál F-FDTL Enkoraza Joven Sira Iha Leorema Hasa'e Produsaun Kafé Leobali

Kuartel Jeneràl, 22/01/2026

Kinta-Feira ne'e Xefe Estadu Maior Jenerál F-FDTL Tenente Jenerál Domingos Raúl "Falur Rate Laek" hetan Vizita ida husi Koordenadór Kafé Leobali Leorema Emanuel Lobato iha Kuartel Jenerál Fatuhada Dili.

Iha Vizita ne'e Joven Produtivu ne'e hanesan mós Koordenadór Kafé Leobali senti onradu bele hasoru malu ho Eis Funu nain aktual Xefe Estadu Maior Jenerál F-FDTL Falur Rate Laek hodi konversa oituan kona-bá Ezisténsia Kafé Leobali no nia produtu sira alende ida ne'e koordenadór Leobali ne'e Konvida mós Xefe Estadu Maior Jenerál F-FDTL ne'e sei partisipa mós iha Leobali festival kafé ne'ebé sei realiza iha fulan Juñu tinan ne'e.

Nune'e Koordenadór Kafé Leobali ne'e lori mós produtu Kafé leobali ne'ebé produz iha Kafé Leobali Leorema fó ba Xefe Estadu Maior Jenerál F-FDTL Falur Rate Laek parte ida hodi halo promosaun ba produtu ne'ebé produz iha suku Leorema, Postu Administrativu Bazartete, Munisipiu Likisa, nune'e Xefe Estadu Maior Jenerál F-FDTL ne'e entrega mós Lembransa ida ba Koordenadór Leobali hodi hametin lasu amizade ida hodi ohin ba oin.

Hafoin Remata Sorumutu ne'e Xefe Estadu Maior Jenerál F-FDTL Falur Rate Laek mós enkoraza joven produtivu ne'e inklui mós joven sira iha Leobali atu kontinua servisu hodi aumenta kuantidade produsaun kafé nune'e hodi dinamiza produsaun sira seluk ne'ebé bele kontribui ba desenvolvimentu ekonómia iha rai laran.

" Ita nia objetivu lolos husi ukun rasik an mak harii rasik ita nia produsaun hodi haburas ita nia ekonómia rai laran aumenta kuantidade produsaun kafé hodi dinamiza produsaun sira seluk ne'ebé bele kontribui ba desenvolvimentu ekonómia rai laran" Tenente Jenerál Enkoraza.

Kafé Leobali harii husi Joventude Leorema iha loron 3 fulan Marsu 2023 iha Suku Leorema, Postu Admistrativu Bazartete, Munisipiu Likisa wainhira selebra loron nasionál veteranos nian.

Ekipa Média F-FDTL

Sold. Boni Mendonça