Xefe Estadu Maior Jenerál F-FDTL Husu Bá PNTL Halo Investigasaun Klean Bá Kazu Iha Mehara

Dili, 11 Maiu 2026

Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek hateten, to’o agora nia parte seidauk simu relatoriu ofisiál kona-bá involvimentu membru FALINTIL-FDTL ne’ebé alegadamente involve iha konfrontu entre joven sira, ne’ebé maka akontese iha Suku Mehara, Postu Administrativu Tutuala Munisípiu Lautém, hodi rejulta joven ida lakon vida no seluk kanek todan.

Tenente Jenerál Falur Rate Laek mós husu bá Polisia Nasionál Timor-Leste (PNTL) atu halo investigasaun klean bá konfrontu ne’e no nia afirma katak bainhira desijaun ikus maka membru husi F-FDTL ne’e komete duni krime maka komandu sei foti medida bá membru F-FDTL ne’e.

“ Kazu ne’e hau rona ona atraves husi informasaun nomós husi media sosial, ita mós tenke fó parabéns bá ita nia Polisia Nasionál Timor-Leste (PNTL) tamba kazu ne’e akontese la to’o 24 oras, sira konsege asegura kedas, prosesu ne’e hein deit husi parte investigasaun mak bele hatene, depois maka husi komandu halo prosesu administrativa tuir regulamentu disiplinar militár (RDM), primeiru identifika lai nia husi Komponente ka Unidade ida ne’ebé, sira iha ne’eba mak hadia uluk depois mak mai to’o iha hau” hateten Tenente Jenerál.

Xefe Estadu Maior Jenerál F-FDTL ne’e haktuir nia parte simu ona informasaun kona-bá deskonfia envolvimentu membru F-FDTL iha konfrontu entre joven sira, ne’ebé maka akontese iha Suku Mehara, maibé Xefe Estadu Maior Jenerál F-FDTL seidauk simu relatoriu ofisiál kona-bá akontesimentu ne’e.

Relasiaona ho akontesementu ne’e, dadaun ne’e parte husi Polisia Nasionál Timor-Leste (PNTL) asegura ona suspeitu sira iha sela detensaun Komandu PNTL Munisípiu Lautém hodi hein prosesu identifikasaun tuir mai.

Media F-FDTL