Membru F-FDTL Nain-10 Termina Formasaun Finansa No Kontabilidade Iha Eiros Group

Dili, 03 Agostu 2026

Membru FALINTIL-Forsa Defeza Timor-Leste (F-FDTL) nain-10, kompostu husi Komponente Terrestre nain-2, Komponente Naval nain-1, Komponente Aéreo nain-1, Forsa Apoiu Gerál nain-1 no Kuartel Jenerál nain-5, termina ona formasaun Finansa no Kontabilidade ne'ebé hala'o iha Eiros Group Mandarin Dili.

Serimónia enseramentu formasaun ne'e reprezenta husi Xefe Gabinete Xefe Estadu Maior Jenerál F-FDTL, Tenente Koronel Rui Soares, ne'ebé akompaña husi Tenente Koronel Graduadu Inf. UE Gregório Bernardo Correia Kapitaun Tenente António do Rosário, Kapitaun Eurozio Pinto no Xefe Seksaun Jenero F-FDTL Kapitaun Marquita da Cunha.

Iha nia diskursu, Reprezentante Diretór Eiros Group, José R. M. Soares, hato'o agradeseimentu ba instituisaun F-FDTL ne'ebé fó fiar ba Eiros Group hodi fasilita formasaun ho progama Finansa no Kontabilidade ba membru F-FDTL sira.

"Agradese ba F-FDTL ne'ebé fo fiar ba Eiros Group hodi fasilita formasaun ba membru F-FDTL sira objetivu prinsipál husi formasaun ne'e mak atu hasa'e kapasidade membru F-FDTL sira, liuliu iha área jestaun osan no oinsá atu jere ho di'ak relatóriu finanseiru iha kontabilidade, hodi asegura transparénsia no responsabilidade iha jestaun finanseira instituisaun,Finansa no Kontabilidade mak pilar prinsipál ba instituisaun hotu-hotu. Tanba ne'e, importante tebes atu membru sira iha koñesimentu no abilidade ne'ebé di'ak iha área ida ne'e,” hateten Reprezentante Diretór Eiros Group, José R. M. Soares.

Iha sorin seluk, Reprezentante Xefe Gabinete Xefe Estadu Maior Jenerál F-FDTL, Tenente Koronel Rui Soares, hato'o mós agradeseimentu no obrigadu-wain ba Eiros Group, ne'ebé fó matenek, koñesimentu no fasilidade ba membru militár sira durante prosesu formasaun.

"formasaun Finansa no Kontabilidade iha importánsia boot ba instituisaun F-FDTL, tanba koñesimentu ne'ebé membru sira hetan bele aplika iha unidade no fatin servisu ida-idak, liuliu iha jestaun orsamentu, preparasaun relatóriu finanseiru, transparénsia, kontabilidade no responsabilidade institusionál,formasaun Finansa no Kontabilidade importante ba ita nia instituisaun, liuliu iha F-FDTL nune'e Koñesimentu ne'ebé imi hetan iha Eiros Group bele ajuda imi iha unidade ida-idak atu halo jestaun orsamentu ho di'ak, prepara relatóriu ne'ebé di'ak, no kontribui ba transparénsia, kontabilidade no responsabilidade iha instituisaun,” hateten Tenente Koronel Rui Soares.

Serimónia enseramentu ne'e marka mós kompromisu hamutuk entre F-FDTL no Eiros Group iha esforsu atu hasa'e kapasidade no profisionalizmu membru militár sira, liuliu iha área finansa no kontabilidade, hodi suporta jestaun institusionál ne'ebé efisiente, transparente no responsavel.

Ekipa Média F-FDTL

Francisco