Membru F-FDTL Nain-18 Husi Kuartél Jenerál Promovidu Husi Soldadu Bá Postu Cabo

Kuartél Jenerál, 06 Jullu 2026 

Komandu FALINTIL-Forsa Defeza Timor-Leste (F-FDTL), liuhusi Adjuntu Xefe Estadu Maior F-FDTL, Koronel Tirosinado Mario Baptista “BERSAMA”, hamutuk ho xefe divizaun sira no ofisiál superiór sira iha Kuartél Jenerál, ohin halo serimónia promosaun bá membru F-FDTL hamutuk nain-18, inklui feto nain-3, husi postu soldadu bá Postu Cabo.

Promosaun ne'e realiza bazeia bá Despaxu n.º 055/CEMG-F-FDTL/2026, tuir Dekretu-Lei n.º 33/2020, loron 2 Setembru, ne'ebé altera husi Dekretu-Lei n.º 21/2024, loron 24 Abril, kona-bá Estatutu Pesoál Militár F-FDTL nian, liuliu Artigu 71 kona-bá kondisaun jerál bá promosaun no Artigu 76.

Membru militár sira ne'ebé hetan promosaun bá klasifikasaun Primeiru Cabo/Segundu Marineiru mak sira ne'ebé remata ho susesu Kursu Promosaun Cabo iha fulan Outubru 2025. Antigidade promosaun ne'e sura hahu husi loron, 09 Marsu 2026, tuir klasifikasaun final iha remata Kursu Promosaun Cabo.

Media F-FDTL