Molok Simu Tinan Foun CEMGFA Agradese Bá Parseiru Internasionál Nia Servisu Durante Iha TL No Rekoñese Kooperasaun Di'ak Ho F-FDTL

Dili, 09 Dezembru 2025

Xefe Estadu Maior Jenerál F-FDTL Tenente Jenerál Domingos Raúl " Falur Rate Laek" no Xefe Estadu Maior F-FDTL Brigadeiro Jenerál José da Costa Soares "Trix" akompaña mós husi Xefe Gabinete Ministru Defeza Hamutuk ho Komandante Komponente no Unidades Inklui Ofisiais Superiores sira iha Instituisaun F-FDTL Jantar konfraternizasaun ho parseiru dezenvolvimentu sira, asesor internasional sira iha Timor-Leste inklui Adidu defeza sira iha TL hanesan simbolu agradesimentu ida ho parseiru Internasional sira ne'ebé durante ne'e hala'o misaun iha Timor-Leste liu-liu kooperasaun ne'ebé diak ho Instituisaun F-FDTL molok simu tinan foun 2026.

"Ohin kalan, ita tau ba sorin momentu rigidez protokolu operasionál sira hodi selebra buat ida fundamentál iha vida militár no diplomátika, mak: konfiansa mútua. Ha'u hateke hale'u sala ida-ne'e no ha'u haree la'ós de'it reprezentante husi nasaun belun sira ka organizasaun internasionál sira; Ha'u haree parseíru sira no belun sira ne'ebé la'o hamutuk ho F-FDTL iha ami-nia misaun nobre atu serbí Timor-Leste".

"Ita-boot sira nia prezensa iha ne'e hanesan testemuña ba kompromisu ida ne'ebé kontínua Evolusaun husi ami-nia Forsa Armada, husi tempu rezisténsia nian atu instituisaun moderna no profisionál ne'ebé ita iha ohin loron, deve barak ba ita-boot sira-nia apoiu tékniku, ita-boot sira-nia konsellu estratéjiku, no laran-luak husi ita-boot sira-nia nasaun no organizasaun sira. Ba deit konstante ida-ne'e, hato'o pesoál militár F-FDTL tomak nia naran, ami-nia rekoñese ne'ebé klean".

"Relasaun ida ne'ebé maduru no dura, hanesan ida ne'ebé ami iha ho ita-boot, la'ós de'it loro-matan nia nabilan iha tinan tomak, Ha'u rekoñese katak ita nia jornada hamutuk foin lalais ne'e iha momentu sira instabilidade nian (sa'e no tun). Iha tempu produtividade no armonia, maibé iha mós períodu sira bainhira aprosimasaun ba rezultadu sira ka intensidade ita-nia serbisu hamutuk nian flutua, tamba dinámika interna ajustamentu iha prioridade sira, ka situasaun sira iha vida institusionál".

"Ha'u haree flutuasaun sira-ne'e hanesan naturál, hatene katak perfeisaun maka objetivu, maibé la'ós pontu partida Importante la'ós katak ita sempre konkorda iha buat hotu ka mantein ritmu ne'ebé hanesan, maibé importante liu katak ita nunka hakotu lasu sira ne'ebé halibur ita, ne'ebé afirma ita-nia reziliénsia iha kooperasaun".

"Senñores Adidus no Asesór sira, Ohin loron ita moris iha mundu ida ne'ebé komplexu, volatil no nakonu ho inserteza, Ameasa sira difuza no laiha fronteira. Iha kontestu jeopolitiku ezijente ida-ne'e, izolamentu maka dalan ba irrelevansia no inseguransa".

"Tanba ne'e, importante tebes atu ita servisu hamutuk no bainhira ha'u hatete "hamutuk", ha'u hakarak hatete kooperasaun halo ba transparénsia totál no hanoin nakloke. Ita presiza respeita soberánia sira, maibé mós fahe vizaun sira ho klaru, Odamatan ha'u-nia komandu nian sei nakloke nafatin ba diálogu franku, krítika konstrutiva, no planeamentu konjunta, tamba ho dalan ida-ne'e de'it mak ita bele dignifika papel ne'ebé ita ida-idak hala'o".

"Hein katak jantar ida-ne'e serve atu hafoun ita-nia enerjia no reafirma ita-nia vontade atu kolabora. Mai ita haree ba futuru ho serteza katak, se iha lealdade no transparénsia, sei laiha obstáklu ne'ebé ita labele ultrapasa".

"Ikus liu, bainhira ita hakbesik ba siklu tinan nia rohan, ha'u labele husik oportunidade ida-ne'e liu. Ha'u hatene katak imi barak mak dook husi imi-nia família no rai-moris, sakrifísiu ida ne'ebé ita, militár sira, komprende diak liu".

Tanba ne'e, ha'u hakarak hato'o Boas Festas Natál no Tinan Foun ba ita boot sira hotu no ba família sira ne'ebé nakonu ho prosperidade, saúde, no dame. Hein katak tinan oin mai lori matenek mai ita atu hametin liután lasu sira ne'ebé halibur ita-nia nasaun no ita-nia instituisaun".Remata.

Jantar Konfraternizasaun ne'e hanesan. simbolu agradesimentu parseiru Internasionál sira nia servisu no kooperasaun ho F-FDTL Durante servisu hamutuk, Serimónia agradesimentu ne'e hala'o iha Nelayan Restaurant Bidau Partisipa husi Xefe Estadu Maior Jenerál F-FDTL Tenente Jenerál Falur Rate Laek, Xefe Estadu Maior F-FDTL Brigadeiro Jenerál José da Costa Soares"Trix", Representante Ministru Defeza, Komandante Componentes no Unidades Adidu Defeza sira, asesor internasionál inklui Ofisiais Superiores sira iha F-FDTL.

Ekipa Média F-FDTL

Boni Mendonça