Laga, 14 Junu 2025

Komandu FALINTIL-Forsa Defeza Timor-Leste (F-FDTL) Liu husi Komponenete Naval ho família halot ona Saudozu Grumete Reinaldo Ximenes, Nia Isin Mate iha Semiteriu Gariwai Postu Administrativu Laga Munisípiu Baucau.

Bioagrafia Saudozu Reinaldo Ximenes .

Saudozo Reinaldo Ximenes Moris iha Laga iha loron 10 fulan Maiu Tinan 1996 oan husi Manuel Ximenes Kodigo (besi krekas)

Inan maria Imaculada Ximenes .

Husi knua Laga, Uma lisan rata Inawai, Saudozu Reinaldo Ximenes oan ikus husi maun Alin nain4

Dahuluk, Filomeno Virgilo Ximenes

Daruak, Filomena Martins Ximenes

Matebian Ona (anjo)

Datoluk, Reinaldo Ximenes ( matebian rasik)

Saudozu husik hela nia kaben ho naran Hemerensiana pereira no oan Feto nain1, maka Reinalda pereira Ximenes .

Saudozu hahu estudu iha eskola Primaria Bazica Central (EBC) soba Laga iha tinan 2002-2008 no pre-sekundaria iha SMPK. Dom Bosco Laga iha tinan 2008-2011

Secundaria SMA 1 Tequinomata Laga iha tinan 2011-2014.

Saudozu hahu inkorpora mai ih Instituisaun FALINTIL-FDTL ho posto soldado iha loron 27 fulan Setembru tinan 2021 iha CICNL Metinaro, depois termina instrusaun durante fulan Neen, Saudozu koloka kedas bá iha Komponente Naval iha tinan 2022, iha tinan 2023 Saudozu tuir kursu formasaun bá Korpu Komando Fuzileiros, Saudozu didika nia a'an tomak bá iha Instituisaun FALINTIL-FDTL liliu iha Komponente Naval durante tinan 4, durante tempu naruk Ida ne’e Saudozo hala’o nia Kna'ar nu'udar membro 2 grupu destakamentu alfa, iha sorin seluk Saudozo mós partisipa Iha Exersísiu Carat ne’ebé hala’o iha Baze Naval Hera (BNH) iha tinan 2023.

Ne’e maka istória Moris husi Saudozu nian, no rohan ona bá nia responsabilidade hanesan membru Komponente Naval hodi servi no didika bá Instituisaun FALINTIL-FDTL no rai doben Timor - Leste .

Iha loron sanulu fulan Junu 2025 Saudozu hakotu nia peregrinasaun iha mundo ne’e iha posto destakadu RAEOA, no husik hela faluk no oan kiak nomós família bo'ot FALINTIL- FDTL espesialmente bá Komponente Naval.

Buat barak maka nia konsege Hala’o ona i balun nia sei Hala’o hela, fiar katak iha tinan 2025 nia sei finaliza servisu ne’e , maibé infelizmente esperansa sira ne’e la sai realidade tamba maromak bolu ona nia bá iha kadunan santu tamba ne’e Instituisaun F-FDTL espesialmente Komponente Naval sente lakon tebes membru ida ne'ebé hatudu nia didikasaun no servisu diak tebes bá instituisaun ida ne'e.

Ikus ona bá matebian Reinaldo Ximenes rohan ona Ita nia maun alin, hanesan lilin ida Ita bo'ot naroman ona Ita bo'ot nia Nasaun, Ita bo'ot nia Instituisaun no Ita bo'ot nia família Ita nia naroman hirak ne’e ohin mohu naben ona iha ami nia matan, Ita bo'ot nia naran sei metin nafatin iha ami nia fuan laran, istória moruk no midar hotu ne'ebé ita bo'ot hala’o durante iha moris Ida ne’e, kala sai deit ona memoria furak bá Ita bo'ot nia kamarada sira, ita bo'ot nia maun alin sira no Ita bo'ot nia família sira, hamnasa no oin midar Ita bo'ot nia sai deit ona memoria mai ami hotu.

Hatuir lia menon husi Komandante Komponente Naval nian iha fulan Dezembro 2009, katak Militár Ida Nunka kleur ho nia família , so deit nia kaisaun maka sei kleur ho nia família.’’

Ikus no rohan ona bá kamarada, mohu no naben ona maun Alin, anjo sira lalehan hein ona Ita bo'ot.

Adeus Adeus e Adeus Kamarada Reinaldo Ximenes .”

Media F-FDTL

Ekipa Media Komponente Naval F-FDTL

Lautem, 18 Marsu 2026

Komandu FALINTIL-Forsa Defeza Timor-Leste (F-FDTL) liu husi reprejentante Xefe Estadu Maior Jenerál F-FDTL Tenente Koronel Laurentino Gusmão "Mau-Ular hamutuk Prezidente Autoridade Munisípiu Lautem Sr. Melio de Jesus ohin entrega uma esperansa bá inan Faluk Maria Rosa iha Aldeia Kuluhun Suku Fuiloro Postu Administrativu Lospalos Munisípiu Lautem.

Iha diskursu reprejentante Xefe Estadu Maior Jenerál F-FDTL Tenente Koronel Laurentino Gusmão “MAU ULAR” hateten, ohin ita realija serimónia inaugurasaun uma esperansa ida ne’e bá ita nia inan faluk Maria Rosa, ne’e atu hatudu bá povu Timor-Leste katak Forsas Armadas ne’ebé agora dadauk iha ne’e sempre nafatin hamutuk ho povu no sempre iha povu nia fuan.

Nia hatutan tan, atu fortifika fila fali FALINTIL nia prejensa iha komunidade nia le’et maka hodi halo atividade sira ne’e no atividade sira seluk mós sei tuir tan mai, ida ne’e atu hametin nafatin lasu amizade entre povu ho Forsas Armadas iha tempu ukun aan ida ne’e, atu prense bá dezenvolvimentu Nasionál ninian hanesan uluk moto FALINTIL nian katak “ Povu mak be FALINTIL mak ikan” se be laiha ikan labele moris, tamba ida ne’e ami nia agradese bá Prezidente Autoridade Munisípiu Lautem ho estrutura tomak nomós autoridade lokal sira hotu iha Munisípiu Lautem.

Iha fatin hanesan Prezidente Autoridade Munisípiu (PAM) Lautem Sr. Melio de Jesus hateten, lori povo Munisípiu Lautem tomak hakarak hato’o agradese wain bá Xefe Estadu Maior Jenerál F-FDTL Tenente Jenerál Falur Rate Laek ho estrutura tomak ne’ebé maka konstrui ona uma ida ne’e, ita bo’ot sira nia komitmentu atu moris hamutuk ho ita nia povu nia realidade mak ita bo’ot sira hautudu dadauk ne’e, nu’udar Prezidente Autoridade husu bá Goveru sentral, uma ida ne’e sai hanesan referensia ida bá Governu Sentral, ita utilija ita nia Forsas Armadas la’os bá funu deit maibé bá mós moris hamutuk ho sosiedade iha aspetu oinoin bá enfrastutura baziku ninian.

Ida ne’e pasu diak tebes, bá oin Munisípiu Lautem nafatin persija komandu F-FDTL liu husi Ministériu Defesa atu servisu hamutuk.

Akresenta liu tan katak, hau fiar tamba Militár mós la’os treinu bá tiru malu deit maibé treinu mós iha kompañia enzeñaria ninian, sebele ita nia servisu hamutuk ida ne’e la’os para iha ne’e deit, maibé bá oin sebele kontinua no sai diak liutan iha futuru.

Entretantu uma ne’e konstrui husi Komapñia Enzenari FALINTIL-Forsa Defeza Timor-Leste (F-FDTL), uma ne'e nia mediada 10 X 9 kompostu husi kuartu 3"sala 2, haris fatin no dapur, uma refere nia kustu hamutuk 15.000 dolares Amerika.

Média F-FDTL

J. Silva

Kuartel Jenerál Fatuhada-Dili 01Setembru 2025

Komandu FALINTIL-FDTL hamutuk ho funsionáriu Ministéiru Defeza hasae Bandeira Nasionál ba inísiu fulan setembru nian.

Iha âmbito ne'e Xefe Estadu Maior Jenerál Forsa Armada, Tenente Jenerál Domingos Raúl “Falur Rate Laek” Sai hanesan inspetur ba Serimónia Hasae Bandeira Nasionál dahuluk ba Fulan Setembru nian.

Iha intervensaun Xefe Estadu Maior Jenerál Forsas Armadas (CEMGFA), hateten ba militár hotu no mós Funsionáriu Ministéiru Defeza sira liu-liu aktividades lubuk hirak ne’ebé halao liu ona iha fulan agustu ne’ebé ita selebra loron FALINTIL nian ba dala 50.

Iha fatin hanesan Xefe Estadu Maior Jenerál Forsas Armadas Tenente Jenerál Domingos Raúl ’’Falur Rate Laek’’ Hato’o Agradese mós Membru F-FDTL tomak no funsionáriu Ministéiru Defeza sira ne’ebé servisu hamutuk hodi selebra loron FALINTIL nian ho diak no susesu.

Alende ne’e mós Xefe Estadu Maior Jenerál Forsas Armadas Tenente Jenerál Domingos Raúl ’’Falur Rate Laek’’ hato’o parabéns mós ba loron aniversariu konsulta populár ne’ebé Povu Timor-Leste selebra iha semana kotuk tinan ne'e.

Ekipa Média-F-FDTL

Nhoy Borges

Komandu FALINTIL-Forsa Defeza Timor-Leste(F-FDTL) hamutuk ho funsionáriu Ministériu Defeza Segunda-Feira, 04/08/2025 hasa’e Bandeira Nasionál inísiu fulan agostu nian iha resintu Quartel General no Ministériu Defeza Fatuhada Dili 

Iha intervensaun Chefe Estado Maior General Forsas Armadas (CEMGFA-sigla Portugês) Tenente General Domingos Raúl “Falur Rate Laek” hateten husu ba militár hotu no mós funsionariu Ministériu Defeza nian atu nafatin servisu ho fuan no energia hodi marka ita nia prezensa espíritu nasionalismu nian hodi prepara ba komemorasaun loron kriasaun FALINTIL nian ne’ebé sei monu iha 20 de agostu Fulan ne’e.

“Ha’u hakarak hatete ba ita hotu atu servisu ho fuan no energia hodi marka ita nia prezensa espíritu nasionalismu tamba fulan ida ne’e nakonu ho aktiviadade sira barak liu-liu kona-bá preparasaun serimónia 50 Anos kriasaun FALINTIL aktividades barak mak ita halo hanesan aktividade sosiais no kulturais, parada militár, Cimic, Desportivas, la’os ita de’it mak halo, ita konvida mós ita nia entidades Internasionál barak atu mai partisipa testamuña ba ita nia data históriku ida ne’e” Hateten CEMGFA Falur Rate Laek iha dikursus serimónia Hasa’e Bandeira Inísiu Fulan Agostu iha Quartel General Fatuhada Dili.

Iha fatin hanesan Xefe Estadu Maior Jenerál ne’e hateten husu ba militár hotu husi Prasas to Ofisiais sira inklui mós Direktur sira husi Ministériu Defeza nian no mós funsionariu sira hotu atu halo preparasaun maximu ho vontade no energia tomak hodi hein ba komemora loron históriku ne’e.

“ ita tenki esforsu a’an ita buka atu Re-Infrenta situasaun sira ne’e resolve ho esforsu ho energia ho kbi’it ho presensa esperitu atu evita failansu, husu ita hotu kuidadu saúde no ita nia a’an preokupa ho ita nian responsabilidade instituisional ne’e mak importante liu fo komfiansa ba malu esforsu a’an servisu hamutuk atu nune’e ita nia aktividade ne’ebé ita halo tenki ho susesu” Hakotu CEMGFA.

Ekipa Média F-FDTL

Boni Mendonça