Notisia Foun
Dili, 30 Novembru 2025
FALINTIL-Forsa Defeza Timor-Leste no Polísia Nasionál Timor-Leste, Lansa Operasaun konjunta hanaran (Ouro Força Tarefa) Hodi Garante Seguransa iha Territóriu Nasionál Timor-Leste, atividade refere hala'o ho parada jerál iha Kuartel Unidade Espesial Polísia (UEP) iha Fatumeta-Dili.
Iha Diskursu Xefe Estadu Maior Jenerál F-FDTL, Tenente Jenerál Falur Rate Laek, hatete, ohin ita halibur iha momentu istóriku ida ne'e, ultrapasa serimónia formatura simples ne'e momentu ohin, reprezenta sinteze institusionál ita-nia nasaun joven, ne'ebé inkorpora iha Forsa Tarefa Konjunta ne'ebé dezeña atu garante dame no hakmatek durante periódu krítiku sira iha ita-nia vida Nasionál.
"Diretiva politika ne'ebé Konsellu Ministru aprova la'os de'it dokumentu administrativu, maibé marka estratéjiku ida ne'ebé reafirma ita-nia maturidade institusional".
Nia hatutan tán, iha kontestu ida-ne'e, ita hetan tán responsabilidade adisional ida, liuliu hafoin adezaun istórika Timor-Leste nian ba ASEAN iha loron 26 fulan-Outubru tinan ne’e iha Kuala Lumpur. Ita-nia trajetória nu'udar nasaun ida hatudu ho klaru katak susesu iha pilar fundamental tolu, respeitu, adezaun rigorozu ba kadeias komandu, no kapasidade atu servisu hamutuk. Prinsípiu sira ne'ebé forma dezde tempu eróiku sira luta libertasaun nian, kontinua sai ita-nia matadalan ba institusional.
"Forsa Tarefa Konjunta entre F-FDTL no PNTL la'os de'it reprezenta estratéjia operasionál ida, maibé simboliza unidade Nasionál. Ita-nia misaun ba periodu kritiku sira ne'ebé sei mai dia 28 Novembru, Loron Finadu nian, Natal, no Loron Tinan Foun nian - sei ezije husi ita ida-idak tau sentidu aas liu kona-bá responsabilidade institusional no kompromísu ba dame".
Nia informa, Agora ita hetan observasaun Ia'os de'it internalmente, maibé husi komunidade rejionál ida ne'ebé hein ita nia maturidade, profisionalizmu, no abilidade jestaun institusional husi ita.
"Ha'u hakarak subliña, respeitu ba malu, halo kolaborasaun inter-institusional mak setór sira ne'ebé sei lori ita ba susesu. Ne'e la'os formalidade de'it, maibé dever sagradu ba ita-nia ezisténsia nu'udar instituisaun Estadu nian".
Paz la'os kondisaun ida, maibé prosesu konstrusaun ne'ebé kontinua. No ita sira hotu maka ninia arkitetu prinsipál. Ba Rai Doben Timor-Leste ba Dame no ba Estabilidade! Hakotu CEMGFA.
Iha fatin hanesan intervista Komandante Jerál PNTL hatete, Ohin ita realiza formatura jerál entre F-FDTL ho PNTL iha UEP, hodi hala'o servisu iha terrenu, tuir lolos formatura ne’e ita hala'o ona iha semana hirak ba kotuk mais tamba ami tuir atividade iha rai liur entaun ohin maka foin bele realiza.
"Atividade balun ne’ebé maka forsa rua implementa ona bazeia ba rezolusaun governu ne’ebé maka fó sai ona iha fulan rua ba kotuk, Depois de ida ne’e ita nia forsa rua sei halo movimentu hodi hatudu ba ita nia komunidade sira katak sira pronto para atu servisu tanto iha preventive nomos represiva ba situasaun saida de'it maka akontese".
Nia Subliña tán, importante maka servisu hamutuk, ohin sua Exelénsia Xefe estadu Maior Jenerál F-FDTL fó ona mensazen katak servisu hamutuk mak importante atu ne’e bele lori susesu ba iha operasaun ida ne’e.
Bazeia ba Planu operasaun sai ona tantu ba iha F-FDTL no PNTL komandante sira simu hotu ona sira sei asegura tanto hahú husi dia 01 Novembru no dia 02 Novembru loron mate bian ninian ita nia membru sira sei asegura ida ne’e. Remata
Média F-FDTL
J’Silva
