Notisia Foun
Ainaro, Foho-Ailico, 23 Outobru 2025.
Komandu FALINTIL-Forsa Defeza Timor-Leste (F-FDTL), ensera Ezersísiu Cobra 2025 lori militár hakbesik-aan bá povu ne'ebé mak hala'o durante loron sanulu iha Munisípiu Ainaro, Posto Administrativo Hatu-Udo, Suku Foho-Aulico, Aldeia Raimerlau.
Iha diskursu Xefe Estadu Maior Jenerál F-FDTL, Tenente Jenerál Domingos Raúl Falur Rate Laek, hatete, Ezersísiu COBRA 2025, espresaun moris husi ita nia kompromisu institusionál no ita nia responsabilidade bá Nasaun.
Agradesedesimentu klean bá Munisípiu Ainaro bele simu Militár sira nu'udar imi nian oan. Jestua fiar ida ne'e hametin lasu ne'ebé labele haketak entre ita-nia Forsas Armadas no Timoroan hotu-hotu. Tenik Tenente Jenerál iha âmbitu Enseramentu Ezersísiu Cobra 25, iha loron 23 Outobru 2025.
"Asaun sira CIMIC nian ne'ebé ita hala'o-liuliu asaun psiko-sosiál no kuidadu saúde ne'ebé lori bá labarik-hatudu la'ós de'it atu kumpri misaun defeza nian. Ida-ne'e mós fundamentalmente, atu hamriik iha ita-nia populasaun nia sorin bainhira sira presiza duni. Ida-ne'e maka karakter ne'ebé distinge hodi halo servisu ba ita nia rai-doben".
CEMGFA mós subliña, Hahú ohin, faze desizivu ida hein hela ita. Mai ita mantein nafatin vijilánsia konstante no kumpre ho rigorozu misaun sira ne'ebé maka fó mai ita, no kolaborasaun ho PNTL sai nafatin prioridade absoluta.
Tempu importante sira hein hela ita. Timor-Leste nia adezaun formál bá ASEAN iha loron 26 fulan-Outubru marka pasu istóriku ida iha ita-nia trajetória nasionál. Tuir mai maka selebrasaun sira loron 28 fulan-Novembru nian no festividade sira Natal no Tinan Foun nian. Iha momentu sira-ne'e ida-idak, ita-nia Forsa Armadas sira-nia prezensa metin no ordenadu, garante seguransa no estabilidade ba nasaun tomak.
Kompatriota sira hotu, lori ho ita-boot sira iha jornada ida-ne'e orgullu bá devér ne'ebé imi hotu kumpre. Fila fali bá ida-idak nia destakamentu ho kompromisu no determinasaun foun.
Termina Ezersísiu ida-ne'e ho enerjia foun, ha'u hakarak husik hela mensajen ida neʼebé klaru: disiplina mak pilar bá ita-nia Forsas Armadas. Hein katak Militár ida-idak kaer metin prinsipiu ida-ne'e ho metin. Respeitu bá Kadeia Komandu no lealdade institusionál la'ós de'it formalidade sira maka fundasaun ne'ebé harii instituisaun ida ne'ebé forte, dignu no respeitadu. Hakotu CEMGFA.
Iha fatin hanesan Prezidente Autoridade Munisípiu Ainaro hatete, Ezersísiu ida ne'e laos de'it hasa'e abilidade no kapasidade ita boot sira nian, maibé atu hametin lasu amizade militár nian ho komunidade sira hodi koñese forsa ne'e sé, forsa ne'e ita nia oan sira iha ne'ebá atu servi fali povu.
"Ita bo'ot sira nia prezensa ne'e fó mensajen ida furak tebes mai ami ho asaun karidade sira ne'e ami espera katak ho atividade sira la hakotu ona ita boot sira nia prezensa iha Ainaro atu ajuda autoridade no esperiensia ita boot sira nian oinsá mak atu servi no atu fó mensagem ida diak liu ba ita nia joven sira para atu hadomi rai ida ne'e, tamba rai ne la fasil hanesan ohin ita hamrik iha ne'e maibé iha prosesu ida naruk tebes".
Ikus liu hodi povu Ainaro nian espesialmente povu hatu-Udu hakarak hato'o agrdesementu bá F-FDTL hili Ainaro sai hanesan fatin ne'ebé mak furak no murak hodi hala'o Ezersísiu Cobra 25.
Ekipa Media F-FDTL
