Baucau, 23 Juñu 2025
Ministru Defeza (MD), Kontra Almirante Donaciano Costa Gomes Ph.D "Pedro Klamar Fuik" hatete, ohin selebra Aniversáriu Komponente Aérea Lizeira nian bá dala 4, ida ne’e parte integrante husi Forsa Defeza Timor-Leste (F-FDTL) nian ne'ebé halo transformasaun iha tinan 23.
"Komponente Aérea Lizeira nia evolusaun bá tinan 4 ne’e hatudu progresu bo'ot ida nomós hatudu empeñamentu no esforsu sakrifísiu husi ita nia Instituisaun F-FDTL oinsá atu bele dezenvolve ita nia kapasidade balun atu bele iha kbi'it hodi kontrola bá ita nia espasu Aérea Lizeira nian." Dehan Ministru Defeza (MD), Kontra Almirante Donaciano Costa Gomes Ph.D "Pedro Klamar Fuik"
Governante ne’e dehan espasu Aérea ne’e hola parte integrante husi soberania Nasionál ne'ebé define iha rai leten, iha tasi nomós iha lalehan.
"Husi dezenvolvimentu Komponente Aérea Lizeira ninian rasik mak iha progresu no kapasitasaun bá rekursu humanu no kapasitasaun bá meius balun ne'ebé mak ita iha, ne'ebé seidauk ideal no seidauk tama iha planeamentu bá dezenvolvimentu natural tuir Komponente ida ne’e nian maibé ami fiar katak sei iha doatarde bá Komponente Aérea Lizeira sei bele semo ho diak liu no semo para atu bele kontrola no fiskaliza bá ita nia espasu Aéreo."
Komponente ne'ebé foin hamrik sempre iha dezafiu barak iha estrutura, meius ne'ebé sira presiza iha para atu bele dezempeña sira nia funsaun hodi dezenvolve sira nia estrutura orgánika atu nune’e sira bele afirma nu'udar Komponente ida ne'ebé orientadu espesífikamente bá espasu Lalehan nian.
"Ami nia planu polítika mak fó sai ona katak ami sei fó prioridade bá Komponente hotu-hotu mak Komponente Naval, Komponente Aérea Lizeira no Komponente Terrestre ne'ebé ami sei dezenvolve no kapasita atu sira bele operasionaliza no sustenta tuir planeamentu dezenvolvimentu forsa ne'ebé mak eziste."
Iha fatin hanesan Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raúl "Falur Rate Laek" Dehan loron ohin la'os selebra Aniversáriu Komponente Aérea Lizeira nian bá dala 4, maibé dalan ne’ebé loron F-FDTL mai to'o ohin loron atu hasa'e bá públiku mak importante husi Komponente estratéjiku Forsas Armadas nian.
"Hau hanesan Xefe Estadu Maior Jenerál F-FDTL hamutuk ho imi hau orgullu tanba imi nia atingi hamutuk ohin loron Komponente Aérea Lizeira existe bá dala ha'at, ne'e hanesan marka krusial ida bá ita nia Forsas Armadas hodi forsa nia ezisténsia sai hanesan Fundasaun ril bá dezenvolvimentu tanba ne’e hau husu bá imi atu hatur abilidade no Determinasaun hodi enkarna espíritu servisu ne'ebé define iha Instituisaun FALINTIL-FDTL."
ohin selebra loron Komponente Aérea Lizeira ida ne’e hateke mós bá futuru dezafiu sira ne'ebé mak hasoru F-FDTL nu'udar Komponente foun tebes tanba ne’e Xefe Estadu husu bá Autoridade polítika liu-liu Ministru Defeza atu tau atensaun no rekuiñese papel krusial ne'ebé Komponente Aérea Lizeira hala'o seguransa bá soberánia Timor-Leste nian.
"Aktividade krusial sira ne'ebé sei halo mak wainhira ita iha kapasidade mak ita halo operasaun buska no salvamentu nian no fornese apoiu logistika bá vizilánsia Aéreo ho nune’e ita tenke hanoin atu kontinua no investe formasaun meius no Téknolojia bá parseria ne'ebé sei permite bá ita atu hasa'e kapasidade bá Komponente Aérea lizeira nian."
Komandante Komponente Aérea Lizeira Koronel Helder da Costa hateten, ohin Selebra Aniversáriu Komponente Aérea Lizeira nian bá dala 4 Komponente Aéreo prepara ona pilotu nain 4 no iha mós avioneta 2 hodi bele kontrola espasu Aéreo nian iha teritóriu tomak.
"Tanba ita hotu hatene ami nia misaun foin hahú presiza ema hotu nia apoiu oinsá ami bele hala'o ami nia misaun, oinsá ami atu hala'o vizilansia ou kontrola bá ita nia Aéreo nian tanba atu kontrola Aéreo nian presiza meius barak hanesan radar oinsá mak ami bele to iha lalehan ne'eba presiza helikoptru atu nune’e ami bele utiliza hodi kontrola ita nia Aéreo nian."
Komponente Aérea Lizeira labele servisu mesak maibé presiza mós apoiu husi Komponente Naval nomós Komponente Terrestre atu nune’e bele kontrola bá soberania Timor-Leste nian ho diak ba futuru.
Partisipa iha serimónia Aniversáriu Komponente Aérea Lizeira ne'e maka hanesan, Ministru Defeza Contra Almirante Donaciano Costa Gomes Ph.D, Xefe Estadu Maior Jenerál F-FDTL Tenente Jenerál Falur Rate Laek, Eis PR i Eis PM Jenerál Taur Matan Ruak, Prezidente Autoridade Munisípiu Baucau Sra. Veneranda Lemos, Tenente Jenerál reformado Lere Anan Timur, Adido Militares sira, Xefe Estadu Maior F-FDTL Brigadeiro Jenerál José da Costa Soares 'TRIX', Major Jenerál MAUNANA, Komandante Komponente no Unidades, Komandante PNTL Munisípiu Dili, Komandante PNTL Munisípiu Baucau, Nai Veteranus sira, Autoridade Lokal, ACCTL, ANTL.IP, BNCTL, Dirasaun Nasionál Transporte Terrestre Munisípiu Baucau, Família bo'ot AFAMA CAL nian, Ofisiais Sarjentu no Prasas, nomós Família sira Hotu.
Ekipa Media F-FDTL
Leoneto de Jesus
Domingos Sarmento
