Brazil, 03 Abril 2025.

‎

‎Xefe Estadu Maiór Jenerál F-FDTL, Tenente Jenerál Falur Rate Laek, hanesan mós Autoridade Marítima Nasionál (AMN), akompaña husi Embaixadora Extraordinária no Plenipotensiária Timor-Leste nian akreditada iha Repúblika Federativa Brazil, Dra. Maria Ângela Guterres Viegas Carrascalão, vizita Diretoria de Portos e Costas (DPC), nune`e mos Capitania dos Portos (CP) iha baze Mariña Rio de Janeiro Brazil.

‎‎Objetivu husi vizita ne’e atu koñese estrutura DPC nu’udar Organizasaun Militár husi Mariña Brazil nian ne’ebé subordinadu ba Diresaun Jerál Navegasaun.

‎‎Diresaun ida-ne'ebé responsável bá elaborasaun padraun sira iha âmbitu atribuisaun sira reprezentante Autoridade Marítima Brazileira, ne'ebé atua iha área Seguransa Tráfiku iha Via Bee.

‎‎Aleinde ida ne'e, iha mós Sistema Edukasaun Profisionál Marítima, padroniza no superviziona jestaun ambientál, monitoriza polítika no rezolusaun marítima sira ne'ebé fó sai husi Organizasaun Marítima Internasionál (IMO), no mós jere prosesu sira Ajénsia sira ne'ebé namkari iha teritóriu nasionál tomak.

‎‎Durante vizita iha fatin rua ne`e, iha nia intervensaun CEMGFA Tenente Jenerál nu’udar AMN fahe mós dispozisaun legál sira ne’ebé hatuur iha Dekretu-Lei Nú. 39/2020, loron 23 fulan-setembru, ne’ebé kria Sistema Autoridade Marítima Timor-Leste (SAM), no Estrutura Orgánika Autoridade Marítima Nasionál, liu husi Dekretu-Lei Nú. 31 Maiu, afirma katak nia prioridade atu tau servisu deskonsentradu sira iha funsionamentu.

‎‎Subliña tán katak ho funsionamentu Kapitania Portu iha tempu badak sei sai marku inisiál no faze insipiente hodi garante ezersísiu podér públiku iha espasu marítimu sira iha soberania no jurisdisaun nasionál no funsionamentu ba administrasaun no koordenasaun ba órgaun no servisu sira ne’ebé funsiona iha âmbitu SAM nian, haktuir ba prinsípiu subsidiaridade, komplementaridade, proporsionalidade no uzu rasionál ba rekursu Estadu nian.

‎

Média F-FDTL