Ministru Defeza Hateten: Mudansa La'os Inimigu No Inimigu Ba Sira Ne'ebé Rezisti Ba Mudansa

Quartel General ,05 Janeiro 2026 

S. E. Ministru Defeza Donaciano da Costa Gomes PhD. "Pedro Klamar Fuik" hala'o sorumutuk dahuluk ba tinan 2026 hamutuk ho Komandu F-FDTL no mós funsionáriu sira husi Ministériu Defeza, Autoridade Marítima Nasionál inklui mós Instituto Defeza Nasionál kona-ba Tempo - katak "Tempo de constituir nova energia para manter a esperança e resiliência no processo de desenvolvimento nacional, em particular na defesa e segurança nacional".

Durante refleksaun, Ministru Defeza Kontra-Almirante "Pedro Klamar Fuik" enkoraza nafatin Komandu F-FDTL no funsionáriu hotu-hotu atu valoriza nafatin tempu tantu iha vida pessoal no profisionál nune'e bele adapta ba mudansa sira ne'ebé akontese.

Membru Governu da-9 ne'e subliña, organizasaun barak falla tamba ema barak sai barukten no kontinua halo buat hotu ho moda tuan nian no la konsiente katak mundu kontinua iha mudansa konstante iha espasu.

"Mudansa la'os inimigu. Inimigu ba sira ne'ebé rezisti ba mudansa. Ida ne'e mak pensamentu saudável atu ema hotu-hotu bele aseita katak, mudansa ne'e bele akontese ho kualker maneira atu nune'e ema hotu-hotu bele organiza nia a'an ho diak", haktuir Membru Governu ne'e.

Iha Refleksaun kona-bá tempu ne'e fó husi S. E. Ministru Defeza ne'e ho ponto de vista akadémiku iha ne'ebé tulun tebes funsionáriu sira atu organiza tempu sira ho efisiente no efikaz iha servisu fatin.

Partisipa iha refleksaun ne'e Xefe Estadu Maior Jenerál F-FDTL Tenente Jenerál Falur Rate Laek, Xefe Estadu Maior F-FDTL Brigadeiro Jenerál José da Costa Soares "Trix", Militar F-FDTL husi Kuartel Jenerál, Funsionáriu Ministériu Defeza, AMN, no mós IDN.

Média F-FDTL

Sold. Boni Mendonça