RAEOA, 07 Abríl 2026
FALINTIL-Forsa Defeza Timor-Leste (F-FDTL), Liu husi Xefe Estadu Maior F-FDTL Brigadeiru Jenerál José da Costa Soares "TRIX" akompaña husi komandante 2° BI/CT Tenente Koronel Graduadu Gregorio Bernardo Correia hamutuk ho Ofisiais nain-6, Sargento nain-2, Cabu nain-4 no prasa nain-1 hasoru malu ho reprezentante Autoriedade Munisípal Rejiaun Admistrativa Espesial Oé-cusse Ambeno (RAEOA) Sr. José Ase neno colo atual hanesan Diretór Rezionál Terras i Propiedade Munisípiu RAEOA ho nia estrutura.
Objetivu husi vizita ne'e parte ida atu hametin relasaun amizade entre Autoridade REAOA ho F-FDTL inklui mós kolia liu ba asuntu importante sira kona ba destakamentu forsa nian iha RAEOA nomós planu sei aumenta tan destakadu foun iha Sub-rejiaun Pasabé, Nitibé, pante makassar no Oesilo.
Hafoin surumutu, Xefe Estadu Maior F-FDTL ne'e haktuir intensaun komandu F-FDTL nian atu ható agradese ba autoridade RAEOA ne'ebé halo koopersaun diak tebes ho Instituisaun F-FDTL fó rai hodi hari postu destakadu sira iha teritóriu RAEOA nian.
"Hakarak fo obrigadu wain ba parte hotu hodi fó oportunidade no posibilidade ne'ebé fo mai ami Forsa deska hahú husi 2016 too mai agora no tuir intensaun komandu nia estatuto forsa nian katak atu halo oinsa para bele destaka forsa iha teritóriu Timor Laran hotu" haktuir Eis Funu Nain ne'e.
Hafoin remata Enkontru Xefe Estadu Maior F-FDTL ho nia delegasaun hamutuk ho ekipa ida husi PAM RAEOA nian ba kedas iha Postu oesilo hodi hare rai ne'ebé komunidade Oesilo entrega hodi Konstrui postu destakadu iha Sub-Rejiaun Oesilo.
Tuir planu komandu FALINTIL-FDTL nian sei halo kooperasaun diak liu tan ho Autoridade RAEOA nian hodi hari tan postu destakadu iha sub-rejiaun Pasabé, Nitibé, pante makassar no Oesilo nune'e hodi hakbesik liu tan ba iha komunidade aréa remotas nune'e bele garante pas no halo amigavel liu tan ho komunidade sira.
Ekipa Média F-FDTL
J' Silva
