Hera, 03 Fevereiru 2026
Komandu FALINTIL-Forsa Defeza Timor-Leste (F-FDTL) Liu husi Komponente Naval halo promosaun diviza bá membru F-FDTL hamutuk nain-28 kompostu husi Segundo Tenente promove bá Primeiru Tenente nain-11 no sub-Tenente promove bá segundo Tenente nain-9 no primeiru sarjentu promove bá Sargento Ajudante nain-6 no Segundo Sargentu promove bá Primeiru Sarjentu nain-2.
Komandante Komponente Naval, Komodoro Higino Higene da Neves “Super-Man” hateten, bá Militár hotu-hotu nia prezensa iha ne’e promosaun ida ne’e importante tebes, tanba komandu rekonese sakrifisiu no dedikasaun ne’ebé membru sira kontribui.
Komodoro Neves afirma, promosaun ne’e importante ida bá iha Komponente Naval, tuir lolos sira hotu-hotu promove iha Aileu 02 Feveiru 2026, maibé iha Aileu formaliza deit balu, agora ne’e hanesan legaliza deit bá iha promosaun ne’e.
“Ohin ita asisti fali eventu importante ida bá iha Komponente Naval. Bá postu Cabu mós ita sei promove tuir mai, ita sei hare tempu para ita promove, agora ita promove ida ne’e hotu-hotu dia 02 fevereiru nian. Ita seidauk tau diviza iha sira nia kabas, maibé hotu-hotu promove ona”, deklara nia iha diskursu.
Nia hatutan, agora atu ofisializa promosaun ne’e mak Cabo nian hein oituan, Komandu sei organiza fali, tanba ne’e mak ohin promove de’it bá iha ofisial sira nomós sargentu sira. Nune’e komandu hato’o mós parabéns bá sira ne’ebé promovidu.
Komandante komponente Naval mós hato’o agradese no apresia bá membru Militár sira ne’ebé mak susesu halo parada Militár iha Aileu bá komemorasaun loron transformasaun FALINTIL nian bá tinan-25, realiza iha 02 Fevereiru 2026.
“Ita bo'ot sira nia disiplinar, moral loyaldade hatudu kontinua hamorin Komponente Naval nian iha ita nia povu nia matan, nomós bá iha nai ulun sira nia matan.Kontinua nafatin servisu haka’as aan hodi bele lori nafatin prestizu Naval nian”,
Ho promosaun ne’e, Komodoro Neves hateten, hanesan komandante kontente, tanba hetan Militár lubuk ida ke aumenta sira nia diviza no aumenta sira nia responsalidade hodi ka’er Komponente Naval bá oin. Tanba dekretu lei ne’ebé aprova ona katak, veteranus sira idade 50 bá leten ne’ebé ativu iha F-FDTL bá oin, la’os ona tropa Militár, maibé reformado ona.
“Ita bo'ot sira hatene ida ne’e, signifika entrega ona kna'ar ida ne’e bá jerasaun foun, sira ne’ebé rezerva besik nain-20, tanba sira nia naran taka sai ona iha jornal Repúblika katak, komesa bá oin sira reforma no rezerva ona”,
“Sira ne’ebé mak ohin simu postu foun, ema barak kontenti, tanba de’it diviza nomós osan dalaruma aumenta, mais responsabilidade bo’ot ne’ebé instituisaun no Nasaun fiar bá ita atu simu kna'ar ida ne’e hodi bele dezenvolve Komponente Naval, liu-liu iha area ne’ebé ida-idak nia kompotensia define ona, balu area administrasaun no balu komando nian”,
Tanba ne’e komandante ne’e fi’ar katak, promosaun ne’ebé membru sira ne’e simu ho kna’ar ida ne’e asume ho responsabilidade ho loyaldade, respeitu ho koragem nafatin ho imi nia ofisial sira ne’ebé mak komanda ita bo’ot sira, kontinua respeitu sira nomós husu sira nia apoiu, hodi hamutuk kompleta malu hodi halao servisu ho di’ak.
“Komandante ida-idak kuandu aumenta diviza nia kabas, signifika nia inisiativa barak, nia la’os hein atu ordem iha mak nai hala’o servisu, maibé nia mós ema ida ne’ebé iha autoridade atu fó ordem, tanba ne’e mak bá sira-nia ohin postu promosaun, simu posizaun foun iha responsabilidade maka’as para iha inisiativa rasik, oinsa bele organiza organizasaun ida ne’ebe nia lidera, nia iha inisiativa, fiar katak, ida ne’e Komponente Naval bá oin sei tuir mehi asuwain sira husik hela”.
Media F-FDTL
Grumete Cheko
