Jakarta, 16 Abril 2026

Adido Defesa Timor-Leste iha Indonésia, Koronel Renilde Guterres Corte Real e Silva, ho Adjunto Adido Defesa, 2Ten. Fuzileiro João da Silva Soares, hala’o vizita kortezia bá Akademia Militár Angkatan Laut Indonésia iha Perak, Surabaya, hanesan parte husi esforsu kontinuadu atu hametin no aprofunda relasaun kooperasaun bilateral iha área defeza, liuliu iha domíniu edukasaun no formasaun Militár.

Durante vizita ne’e, hala’o enkontru ofisial iha VIP Room Mako R. Soebijakto Akademia Militár Angkatan Laut, ho reprezentante Governu Akademia Naval Indonésia, Col. Laut Pungki Kurniawan, ho akompañamentu husi Lektol.

Laut Arianto Prabowo. Enkontru ne’e fó oportunidade atu realiza troka pontu de vista kona-bá asuntu estratéjiku sira ne’ebé relasiona ho dezenvolvimentu rekursu umanu no fortalésimentu kapasidade institusional.

Diskusaun sira mós inklui avaliasaun jerál kona-bá implementasaun programa formasaun bá kadete Timor oan sira iha Akademia Militár Naval Indonésia, inklui aspetu akademiku, disiplinar no bem-estar, no identifikasaun oportunidade sira atu aumenta no aprofunda kooperasaun iha futuru.

Iha oportunidade hanesan, Adido Defesa ho Adjunto mós hala’o enkontru ho kadete Timor oan ida, Lucas Mau Buti Araújo dos Santos, ne’ebé oras ne'e dadauk hala'o estudu iha Akademia refere. Enkontru ne’e permite atu hatene diretamente progresu no desafiu sira ne’ebé kadete ne’e enfrenta, no hato’o mensajen apoiu, orientasaun no motivasaun husi parte F-FDTL no Ministériu Defeza Timor-Leste.

Vizita kortezia ida ne’e konsidera hanesan kontribuisaun signifikativu ida bá reforsu relasaun amizade no kooperasaun entre F-FDTL ho TNI-AL, no entre Timor-Leste ho Indonésia, no mós bá promosaun dezenvolvimentu rekursu umanu iha setor Militár, ho objetivu atu konstrui Forsas Armadas ne’ebé profissional no modernu iha futuru.

Rezultadu husi vizita ne’e hatudu katak parte rua nakonu ho espírito amizade no emosional pozitivu, no hatudu komitmentu forte atu kontinua hametin relasaun kooperasaun. Parte rua konkorda atu buka mekanismu sira atu aumenta partisipasaun kadete Timor-Leste iha programa edukasaun naval iha Indonésia.

Vizita kortezia ne’e kontribui bá dezenvolvimentu kapasidade institusional iha área defeza, liuliu bá F-FDTL. Espera katak kooperasaun ne’e sei kontinua no sai bo'ot liután iha futuru. Iha jerál, vizita ne’e la’ós deit hanesan atividade formal, maibé mós hanesan pasu importante atu hametin parseria Militár no dezenvolvimentu kapasidade bá futuru.

Atu hatene, oras ne’e iha kadete Timor oan na’in ha’at ne’ebé hala’o hela sira-nia estudu iha akademia Militár Indonésia nian: na’in rua iha Angkatan Darat, ida iha Angkatan Udara, no ida seluk iha Angkatan Laut. Tuir agenda, kadete na’in ha’at ne’e sei gradua iha loron 21 Julho 2026 iha Istana Negara Republik Indonésia, Jakarta.

Iha tempu badak, Adido Defesa sei hala’o vizita hanesan mós bá Akademia Militár Angkatan Darat (AAD) iha Magelang, Jawa Tengah, no Akademia Militár Angkatan Udara (AAU) iha Yogyakarta.

Media F-FDTL

Adjunto Adido Defesa bá Indonésia 2Ten. Fuzileiros João da Silva.

Moçambique, 06 de Março 2026

Adido Defesa Timor-Leste bá Moçambique Koronel João da Costa Esteves akompanha Sr. Embaixador Timor Leste iha Maputo Dr. Luis Miguel Lopez de Sousa Sequeira, hasoru malu ho Diretór Centro Analiza Estratégia (CAE) né'ebé lokaliza iha Maputo- Moçambique.

Iha Okaziaun ne'e Diretór CAE Dr. João Carlos Pires hato'o bemvindu no sente onradu simu reprezentante Timor Leste nian iha Moçambique no hein katak atividade CAE iha Timor-Leste bele funsiona di'ak liutan, tamba iha ona nia reprezentante.

Alende ne'e Diretór CAE mós entrega livru 2 kona-bá ezistensia CAE nian duarnte tinan 25 bá Embaixador no Adidu Defeza Timor-Leste nian iha Moçambique. Livru ne'e nia autor ka hakerek na'in husi Koronel Luís Brás Bernardino prof doutor, ezérsitu Português no Prof.Dra. Kamilla Raquel Rizzi hosi Brasil.

Media F-FDTL

Adido Defesa Timor-Leste bá Moçambique

Maputo Moçambique, 05 Maiu 2026

Adido Defesa Timor-Leste iha Moçambique Koronel João da Costa Esteves, partisipa iha Loron Mundiál Lian no Kultura Portugés iha CPLP ho eventu komemorativu ida, ne’ebé organiza no lidera hosi Sua Exelénsia Embaixadór Luís de Sousa Sequeira.

Serimónia ne’e hetan partisipasaun husi Sua Exelénsia Ilda Raivoso, Konselleira no Diretora bá Organizasaun Internasionál sira husi Ministériu Negósiu Estranjeiru no Kooperasaun Moçambique nian, nu’udar Konvidadu Honra. Marka prezensa mós Embaixadór sira husi Nasaun CPLP ne’ebé akreditadu iha Moçambique, Konsul Honoráriu sira, nune’e mós membru korpu diplomátiku sira, inklui Sekretáriu no Adidu Defesa sira.

Eventu ne’e hahú ho diskursu husi Sua Exelénsia Embaixadór Timor-Leste, ne’ebé hato’o nia diskursu hodi halo alusaun bá data refere, no lee mós mensajen husi Sekretariadu Ezekutivu Timor-Leste nian bá CPLP, eventu ne’e hala’o iha Montebelo Indy Village, iha atmosfera selebrasaun, partilla kulturál no apresiasaun bá lian portugés.

Serimónia ne’e hetan mós partisipasaun husi Adido Defesa Brasil, Adido defesa Angola, Adido Defesa Portugal inkluis mós ho Adido Defesa Timor-Leste Koronel João da Costa Esteves.

Media F-FDTL

Copyright Embaixada TL bá Maputo

Jakarta, 18 Jullu 2025

Adido Defesa Timor-Leste bá Indonésia Koronel Manuel Freitas 'MAUBUTI' oferese han kalan bá Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek ho delegasaun.

Partisipa iha han kalan ne'e maka hanesan, Xefe Estadu Maior Jenerál F-FDTL Tenente Jenerál Falur Rate Laek, Embaixador TL bá Indonésia Sr. Roberto Sarmento de Oliveira Soares, Embaixadora ASEAN TL bá Indonésia Sra. Natércia Cipriano Coelho da Silva, Konseleiru ASEAN bá Indonésia Sr. Crisogno Leandro da Silva, Adjunto Adido Defesa Timor-Leste bá Indonésia Tenente Koronel Grad José Pinto, Asesór CEMGFA nomós Kadetes F-FDTL nain 3 ne'ebé estudu iha Akademia Militár Indonésia.

Media F-FDTL